மூப்பனார் காலமானார்

சென்னை:

தமிழ் மாநில காங்கிரஸ் தலைவர் மூப்பனார் இன்று (வியாழக்கிழமை) காலை 4 மணிக்கு போரூர் ராமச்சந்திராமருத்துவமனையில் காலமானார். அவருக்கு வயது 71.

எலும்பு முறிவு சிகிச்சைக்காக கடந்த ஜூலை 30ம் தேதி மருத்துவமனையில் சேர்க்கப்பட்ட மூப்பனாருக்கு, அங்குஆபரேஷன் வெற்றிகரமாக நடந்தது. அதன் பிறகு, படிப்படியாக அவர் உடல் நிலை தேறி வந்தார்.

இந்நிலையில், கடந்த 5 நாட்களுக்கு முன் நுரையீரலில் ஏற்பட்ட பிரச்சனை காரணமாக, மூப்பனாருக்கு மூச்சுவிடுவதில் சிரமம் ஏற்பட்டது. இதையடுத்து, அவருடைய உடல் நிலையில் பெரும் பின்னடைவு ஏற்பட்டது.

தொடர்ந்து அவருக்குத் தீவிர சிகிச்சை அளிக்கப்பட்டது. அவருக்கு மேற்கொள்ளப்பட்டு வரும் சிகிச்சைமுறைகளிலும் சில மாற்றங்களைச் செய்தனர் மருத்துவர்கள். பல்வேறு துறைகளைச் சேர்ந்த மருத்துவர்கள் 24 மணிநேரமும் மூப்பனாரின் உடல் நிலையைத் தீவிரமாகக் கண்காணித்து வந்தனர்.

ஆனாலும், அவருடைய உடல்நிலை கவலைக்கிடமாக இருந்து வந்தது. இந்நிலையில், வியாழக்கிழமை அதிகாலைஅவருடைய உயிர் பிரிந்தது.

மூப்பனாருக்கு மனைவி, ஒரு மகன், ஒரு மகள் உள்ளனர்.