10வது நாள் அமெரிக்க தாக்குதலில் காபூல் தகர்ப்பு

காபூல்:

ஆப்கானிஸ்தான் மீதான் அமெரிக்காவின் 10வது நாள் (இன்று)தாக்குதலில் காபூல் நகரம் மீது சராமாரியாகக்குண்டுகளை வீசித் தகர்த்தன அமெரிக்க விமானங்கள்.

காபூல் நகரின் தென் கிழக்குப் பகுதியில் உள்ள வரலாற்றுப் புகழ் மிக்க ஒரு கோட்டைச் சுவரை இலக்காகக்கொண்டே இன்றைய தாக்குதலை அமெரிக்க விமானங்கள் நடத்தின.

இக்கோட்டையில் இருந்துதான் தலிபான் படை வீரர்கள் எதிர்த் தாக்குதல் நடத்தி வருவதாகக் கூறப்படுகிறது.

குறைந்தது 6 வெடிச் சத்தங்களாவது கேட்டன என்று நேரில் பார்த்தவர்கள் கூறினர். இதனால் அந்தக்கோட்டையைச் சுற்றிலும் ஏராளமான தூசி மண்டலம் கிளம்பியதாகவும் கூறப்படுகிறது.

காபூல் அருகே உள்ள மராஜான் குன்றுப் பகுதியிலும் அமெரிக்க விமானங்கள் குண்டு வீசின.

இதற்கிடையே நேற்று நடந்த தாக்குதலில், காபூலில் உள்ள செஞ்சிலுவைச் சங்க முகாம் ஒன்று தகர்க்கப்பட்டது.