புதுவை முதல்வராக ரங்கசாமி இன்று பதவியேற்பு

சென்னை:

பாண்டிச்சேரி யூனியன் பிரதேசத்தின் 11-வது முதல்வராக ரங்கசாமி இன்று (சனிக்கிழமை) பதவியேற்கிறார்.

பாண்டிச்சேரியில் முதல்வராக இருந்து வந்த ப.சண்முகம் ராஜினாமா செய்து விட்டார். இதைத் தொடர்ந்து ரங்கசாமி புதிய முதல்வராகதேர்வு செய்யப்பட்டுள்ளார். அவர் சண்முகம் அமைச்சரவையில் பொதுப்பணித்துறை அமைச்சராக இருந்தவர்.

ரங்கசாமியின் தேர்வுக்கு குடியரசுத் தலைவரும் ஒப்புதல் அளித்து விட்டார். இதையடுத்து ஆளுனர் ரஜினி ராய், புதிய அரசு அமைக்குமாறுரங்கசாமிக்கு அழைப்பு விடுத்துள்ளார். கட்சித் தலைவர் சோனியாவுடன் அமைச்சரவை குறித்தும், அதிமுக, தமாகா உடனான கூட்டணிகுறித்தும் விவாதித்த ரங்கசாமி, முதல்வராக சனிக்கிழமை பதவியேற்கிறார்.

ஆளுனர் மாளிகை அமைந்துள்ள ராஜ் நிவாஸில் காலை 11.30 மணிக்கு ரங்கசாமி முதல்வராக பதவியேற்கிறார். அவருக்கு ஆளுநர்ரஜினி ராய் பதவிப்பிரமாணமும் மற்றும் ரகசியக் காப்புப் பிரமாணமும் செய்து வைக்கிறார்.

அமைச்சர்கள் யாரும் ரங்கசாமியுடன் பதவியேற்க மாட்டார்கள். புதியஅமைச்சர்கள் ஞாயிற்றுக்கிழமை பதவியேற்பார்கள் என்றுதெரிகிறது.