திமுக - ரூ.800 கோடி, அதிமுக - ரூ.1,240 கோடி

சென்னை:

முந்தைய திமுக ஆட்சி ரூ.800 கோடி பற்றாக்குறையை ஏற்படுத்திச் சென்றுள்ளது என்று ஜெயலலிதா கூறியதைஅக்கட்சியின் தலைவர் கருணாநிதி இன்று (வியாழக்கிழமை) மறுத்துள்ளார்.

ஆனால் கடந்த 1995-96ல் ஜெயலலிதாவின் அதிமுக ஆட்சி முடிவுக்கு வந்தபோதுதான் ரூ.1,240 கோடிபற்றாக்குறை ஏற்பட்டிருந்தது என்றும் கருணாநிதி பதிலளித்துள்ளார்.

மேலும், அவர் காட்டிய புள்ளிவிவரப்படி, 1995-96ல் அதிமுக ஆட்சி விட்டுச் சென்ற அந்த ரூ.1,240 கோடிபற்றாக்குறையை 1996-97ல் ரூ.962 கோடி பற்றாக்குறையாக திமுக அரசுதான் குறைத்தது.

மேலும் கடந்த ஐந்து ஆண்டுகளில் பொது மக்களுக்கும் அரசு ஊழியர்களுக்கும் எந்தவித பாதிப்பும் இல்லாமல்ஒவ்வொரு ஆண்டும் திமுக அரசு பட்ஜெட் தாக்கல் செய்துள்ளது என்று கூறிய கருணாநிதி, இதுதான் நிர்வாகத்திறமை என்றும் கூறினார்.

இவ்வாறெல்லாம் நாங்கள் நிதி நிலைமைகளைச் சமாளித்தோமே தவிர, முந்தைய அதிமுக விட்டுச் சென்றபற்றாக்குறையைக் காட்டிப் பழி போடவில்லை என்றும் கருணாநிதி தெரிவித்தார்.