பின் லேடன் கொல்லப்பட்டனா? - அமெரிக்கா மெளனம்

வாஷிங்டன்:

சர்வதேச தீவிரவாதியான ஒசாமா பின் லேடன் சமீபத்தில் நடத்தப்பட்ட குண்டு வீச்சுத் தாக்குலில் கொல்லப்பட்டதாகவந்த தகவல்கள் குறித்து பதிலளிக்க அமெரிக்க அதிகாரிகள் மறுத்துள்ளனர்.

தெற்கு ஆப்கானிஸ்தானில் உள்ள ஜாவார் கிலி என்ற குகைப் பகுதியில் ஒளிந்துள்ள அல்-கொய்தா இயக்கத்தினர்மீது கடந்த திங்கள்கிழமை ஏவுகணைத் தாக்குதல் நடத்தப்பட்டதாக அமெரிக்காவின் பல தொலைக்காட்சிநிறுவனங்கள் கூறின.

தோரா போரா மலைப் பகுதிகளில் அமெரிக்க விமானங்கள் நடத்திய பலத்த குண்டு வீச்சு காரணமாக அங்கிருந்துதப்பித்த பின் லேடன் உள்ளிட்ட அல்-கொய்தா தீவிரவாதிகள், ஜாவார் குகைப் பகுதிக்குத் தப்பி அங்குஒளிந்திருந்ததாக சி.பி.எஸ். செய்தி நிறுவனம் கூறியது.

இந்த ஜாவார் குகைப் பகுதியில் கடந்த திங்கள்கிழமை அமெரிக்கா நடத்திய ஏவுகணைத் தாக்குதலால் பின் லேடன்உள்ளிட்ட சில அல்-கொய்தா தலைவர்கள் கொல்லப்பட்டதாகவும் செய்திகள் வெளியாகின.

ஆனால் அமெரிக்காவின் பாதுகாப்புத்துறையோ சி.ஐ.ஏ. உளவுத் துறையோ இதுகுறித்து வாய் திறக்க மறுக்கின்றன.

இதுகுறித்து நாங்கள் எதுவும் இப்போதைக்குக் கூற இயலாது என்று சி.ஐ.ஏ. செய்தித் தொடர்பாளர் ஒருவர்கூறினார்.