மத்திய அமைச்சரவையில் திமுக நீடிக்கும்: கருணாநிதி

சென்னை:

மத்திய அமைச்சரவையில் திமுக தொடர்ந்து நீடிக்கும் என்று திமுக தலைவர் கருணாநிதி இன்று(செவ்வாய்க்கிழமை) கூறினார்.

தமிழக பாஜகவுக்கும் திமுகவுக்கும் இடையேயான உறவு முறிந்து விட்டதாகவும், மத்தியில் உள்ள பாஜகவுடன்மட்டுமே திமுக உறவு கொண்டுள்ளதாக சமீபத்தில் கருணாநிதி கூறினார்.

இதனால் பாஜகவுக்கும், திமுகவுக்கும் இடையேயான உறவில் பெரும் குழப்பம் ஏற்பட்டுள்ளது. அழைப்புஇல்லாமலேயே முதல்வர் ஜெயலலிதா தொடங்கி வைத்த அன்னதானத் திட்ட விழாவில் தமிழக பாஜக கலந்துகொண்டதையடுத்தே திமுக இம்முடிவை எடுத்தது.

இதற்கிடையே மத்திய அமைச்சரவையிலிருந்தும் திமுக வாபஸ் பெற்றுக் கொள்ளும் என்று சில பத்திரிக்கைகளில்இன்று செய்திகள் வெளியாகியிருந்தன. இதுகுறித்து கருணாநிதி நிருபர்களிடம் கூறியதாவது:

தமிழக பாஜகவுடன் உறவு முறிந்தாலும், மத்தியில் திமுக அமைச்சர்கள் விலகுவதாக எந்த முடிவும் எடுக்கவில்லை.மத்திய அமைச்சரவையில் தொடர்ந்து திமுக நீடிக்கும். அதிமுக எதுவும் விஷமம் செய்யாமல் இருந்தால் சரி.

மதிமுக எவ்வாறு, தமிழகத்தில் திமுக, பாஜகவை எதிர்த்தாலும், மத்தியில் அமைச்சரவையில் இருக்கிறதோ அதுபோல் தான் எங்கள் நிலையும் உள்ளது.

மத்திய அமைச்சரவையில் இருந்து திமுக அமைச்சர்கள் விலகுவதாக இருந்தால், கட்சியின் தலைமைக்கு அவர்கள்கட்டுப்பட்டு பதவியை விட்டு விலகுவார்கள்.

தமிழக பாஜகவுடன் திரும்பவும் சமரசம் செய்துக் கொள்ளும் திட்டமோ எண்ணமோ இல்லை என்று கருணாநிதிகூறினார்.