வேடிக்கை பார்க்கும் கருணாநிதி - பாஜக பாய்ச்சல்

சென்னை:

நடிகர் விஜயகாந்த்துக்கும், பாமகவுக்கும் இடையிலான மோதலைத் தீர்த்து வைக்க முயலாமல் வேடிக்கைப்பார்த்துக் கொண்டிருக்கிறார் திமுக தலைவர் கருணாநிதி என்று தமிழக பாஜக செய்தித் தொடர்பாளர் டாக்டர்தமிழிசை செளந்தரராஜன் குற்றம் சாட்டியுள்ளார்.

இதுதொடர்பாக அவர் செய்தியாளர்களிடம் பேசுகையில், மனிதனின் அடிப்படை உரிமையான கருத்துசுதந்திரத்தின் அடிப்படையில், நடிகர் விஜயகாந்த் பாமக குறித்து விமர்சனம் செய்திருந்தார்.

இதைத் தாங்கிக் கொள்ள முடியாமல் பாமகவினர் தொடர்ந்து வன்முறைகளில் ஈடுபட்டு வருகிறார்கள். விஜயகாந்த்நடித்த படத்தை ஓட விட மாட்டோம் என அன்புமணி உள்ளிட்ட பாமகவினர் கொக்கரித்து வருகிறார்கள்.

விஜயகாந்த் பட கட் அவுட்களை உடைத்து நொறுக்குகிறார்கள், உருவ பொம்மையை எரிக்கிறார்கள்.இதையெல்லாம் வேடிக்கை பார்த்துக் கொண்டிருக்கிறார், திரைத் துறையில் இருந்து வந்த கருணாநிதி.

ஒரு திரைப்படக் கலைஞர் பாமகவினரின் அடாவடி செயலால் பாதிக்கப்பட்டு இருக்கிறார். மூத்த திரைப்படக்கலைஞரான கருணாநிதி அதை எதிர்த்துக் குரல் எழுப்பாமல், பாமகவினரை கண்டிக்காமல் வேடிக்கை பார்த்துக்கொண்டிருக்கிறார் என்றார் தமிழிசை.