சிவாஜி கணேசன் வீட்டில் தீ விபத்து

சென்னை:

மறைந்த நடிகர் திலகம் சிவாஜி கணேசனின் வீட்டில் ஏற்பட்ட தீ விபத்தில் பல லட்சம் மதிப்புள்ள தேக்கு மரப்படிக்கட்டுக்கள் எரிந்து சாம்பலாயின.

சிவாஜியின் வீடு சென்னை தியாகராய நகர் தெற்கு போக் சாலையில் உள்ளது. இந்த வீட்டில் நேற்றிரவு 10மணிக்கு தீ விபத்து ஏற்பட்டது. இதில் முதல் தளத்தில் உள்ள மரப் படிக்கட்டு முழுவதும் எரிந்து போனது.

தேக்கு மரத்தால் ஆன இந்தப் படிக்கட்டுகள் பல லட்சம் விலைமதிப்புள்ளதாகும். தீவிபத்து நடந்தபோதுசிவாஜியின் மகன்கள் நடிகர் பிரபு, அண்ணன் ராம்குமார் உள்ளிட்டோர் கீழ் தளத்தில் இருந்தனர்.

மேல் தளத்தில் ஒரு அறையில் சிவாஜியின் தம்பி மகன் கிரிதரன் தனது மனைவி குழந்தைகளுடன் இருந்தார்.படிக்கட்டுகள் தீப் பிடித்து எரிந்ததால் அவர்களால் கீழே வர முடியவில்லை.

அவர்களை தெற்கு போக் சாலை ஆட்டோ நிறுத்தத்தில் இருந்த ஆட்டோ டிரைவர்கள் காப்பாற்றி கீழே கொண்டுவந்தனர்.

சம்பவம் குறித்து அறிந்தவுடன் நடிகர் கமல் சிவாஜியின் வீட்டுக்கு வந்து, சம்பவம் குறித்துகேட்டறிந்தார்.

மின் கசிவு காரணமாக இந்த தீவிபத்து ஏற்பட்டிருப்பதாக காவல்துறையினர் தெரிவித்தனர்.