பொடா ரத்தை எதிர்த்து வாக்கு: அதிமுக

டெல்லி:

பொடா சட்டம் ரத்து செய்யப்படுவதை எதிர்த்து நாடாளுமன்றத்தில் வாக்களிப்போம் என்று அதிமுக அறிவித்துள்ளது.

நடப்பு நாடாளுமன்றக் கூட்டத் தொடரில் பொடா சட்டத்தை ரத்து செய்து மசோதா தாக்கல் செய்யப்படவுள்ளது. இந் நிலையில், இந்த மசோதாவை எதிர்த்து வாக்களிக்கப் போவதாக மாநிலங்களவை அதிமுக தலைவர் நாராயணன் தெரிவித்துள்ளார்.

அவர் கூறுகையில், தீவிரவாதிகளை ஒடுக்க பொடா மிக அவசியம். இந்த சட்டத்தின் மூலம் நக்சலைட்டுகள் மற்றும் விடுதலைப் புலிகளின் நடவடிக்கைகள் ஒடுக்கப்பட்டன. பொடாவை ரத்து செய்துவிட்டால், நாட்டின் பாதுகாப்புக்கு அச்சுறுத்தல் ஏற்படும்.

பொட சட்டத்திற்கு மாற்றாக ஒரு சட்டம் கொண்டு வரப்படும் என்று மத்திய அரசு கூறியுள்ளது. அதற்கு ஆதரவளிப்பது குறித்து பின்னர் முடிவு செய்யப்படும் என்று அவர் கூறினார்.