கார்கள் தொடர் மோதல்: 16 எம்.பிக்கள் தப்பினர்

பாண்டிச்சேரி:

பாண்டிச்சேரி அருகே 16 எம்.பிக்கள் சென்ற கார்கள் தொடர் விபத்தில் சிக்கி ஒன்றுடன் ஒன்று மோதிக் கொண்டன.

நாடாளுமன்ற உணவு மற்றும் வினியோகக் கமிட்டியைச் சேர்ந்த இந்த எம்.பிக்கள் பாண்டிச்சேரியில் உணவுத்துறையின் செயல்பாடு குறித்துஆய்வு செய்ய வந்தனர். தேவேந்திர பிரசாத் தலைமையில் டெல்லியில் இருந்து அதிகாரிகளுடன் விமானத்தில் சென்னை வந்து,அங்கிருந்து 18 கார்களில் பாண்டிச்சேரி சென்றனர்.

கிழக்குக் கடற்கரைச் சாலையில் செய்யூர் என்ற இடத்தில் இடையில் மாடு குறுக்கே வந்தது. இதையடுத்து முதல் கார் சடன் பிரேக் போட்டுநிறுத்தப்பட, பின்னால் வந்த கார்கள் உடனே நிற்க அவகாசமில்லாமல் ஒன்றுடன் ஒன்று மோதின.

இதில் 8 கார்களின் கண்ணாடிகள் உடைந்தன. 4 கார்கள் பலத்த சேதமடைந்தன. ஆனால், அவற்றில் பயணம் செய்த யாருக்கும் காயம்ஏற்படவில்லை. அனைவரும் சிறிது நேர கால தாமதத்துக்குப் பின் மற்ற கார்களில் பயணத்தைத் தொடர்ந்தனர்.