ஹாக்கியில் தொடர் தோல்வி: இந்திய கோச் நீக்கம்

லாகூர்:

ஹாக்கியில் இந்தியா தொடர்ந்து தோல்விகளை சந்தித்து வருவதையொட்டி அதன் பயிற்சியாளரை நீக்க இந்திய சம்மேளனம் முடிவுசெய்துள்ளது.

26வது சாம்பியன் கோப்பை ஹாக்கிப் போட்டிகள் பாகிஸ்தானில் நடைபெற்றன. இதன் இறுதி ஆட்டத்தில் ஸ்பெயின் அணி ஹாலந்தை 4-2என்ற கோல் கணக்கில் தோல்வி அடையச் செய்து முதல் முறையாக சாம்பியன் பட்டம் வென்றது.

வெண்கலப் பதக்கத்துக்கான போட்டியில் இந்தியா, பாகிஸ்தான் அணிகள் மோதின. ஏற்கனவே லீக் போட்டியில் இந்தியாவை வீழ்த்தியஉற்சாகத்துடன் பாகிஸ்தான் அணி களமிறங்கியது.

இதில் பாகிஸ்தான் 3-2 என்ற கோல் கணக்கில் வெற்றி பெற்று வெண்கலப் பதக்கத்தை தட்டிச் சென்றது. இதனால் இந்திய அணி போட்டித்தொடரில் 4வது இடத்திற்குத் தள்ளப்பட்டது.

5வது இடத்துக்கான போட்டியில் ஜெர்மனி 2-1 என்ற கோல் கணக்கில் நியூசிலாந்து அணியை வீழ்த்தியது.

இந்திய பயிற்சியாளர் நீக்கம்:

இந்திய அணி தொடர்ந்து தோல்விகளைச் சந்தித்து வருவதையொட்டி அணியின் பயிற்சியாளர் ஜெர்ஹர்ட் ராச்சை (ஜெர்மன்) நீக்க இந்தியஹாக்கி சம்மேளனம் முடிவெடுத்துள்ளது.

இத் தகவலை ஹாக்கி சம்மேளன பொதுச் செயலாளர் ஜோதி குமரன் தொலைபேசியில் தன்னிடம் தெரிவித்ததாக ராச் கூறியுள்ளார்.இதனையடுத்து ராச் ஹாக்கி சம்மேளன தலைவர் கே.பி.எஸ். கில்லை நாளை சந்திக்கிறார்.