சானியாவுக்குப் பிடித்த சச்சின்

டெல்லி:

தனக்கு பிடித்த விளையாட்டு வீரர் டெண்டுல்கர் தான் என்கிறார் டென்னிஸ் வீராங்கனை சானியா மிர்சா.

18 வயதே ஆன சானியா டென்னிசில் அடுத்தடுத்து வரலாறுகள் படைத்து வருகிறார். இந் நிலையில் டெல்லியில் ஜனாதிபதி கலாம், பிரதமர் மன்மோகன் சிங், காங்கிரஸ் தலைவர் சோனியா, விளையாட்டுத்துறை அமைச்சர் சுனில் தத் ஆகியோரை சந்தித்து வாழ்த்துக்கள் பெற்றார்.

பின்னர் நிருபர்களிடம் பேசிய சானியா,

இப்போது காயம் காரணமாக ஓய்வில் இருக்கிறேன். வரும் 28ம் தேதி துபாயில் தொடங்கும் ஓபன் டென்னில் போட்டியில் பங்கேற்பேன் என்று நினைக்கிறேன். அதற்குள் குணடைந்துவிடுவேன் என்றார்.

சானியா என்ற புயலால் கிரிக்கெட் கூட மங்கிவிட்டதே, யாரை எடுத்தாலும் சானியா சானியா என்று பேசுகிறார்களே என்று கேட்டபோது,

நம் நாட்டில் கிரிக்கெட் விளையாட்டு அல்ல, அது ஒரு மதம் போலத்தான் கடைப்பிடிக்கப்படுகிறது. இதனால் கிரிக்கெட்டின் இடத்தை நான் உள்பட யாரும் பிடித்துவிட முடியாது. நானும் கூட நேநரம் கிடைத்தால் கிரிக்கெட் தான் பார்க்கிறேன் என்றார்.

உங்களுக்கு பிடித்த கிரிக்கெட் வீரர் என்ற கேள்விக்கு, அப்கோர்ஸ் சச்சின் தான் என பளிச் என்று பதில் தந்தார் சானியா.