ரஜினி, கமல் பட விசிடிக்கு தடை

சென்னை: சிவாஜி கணேசன், ரஜினிகாந்த், கமல்ஹாசன், விஜயகாந்த் உள்ளிட்டோர் நடித்த 100 படங்களை விசிடியில் வெளியிட சென்னை உயர்நீதிமன்றம் தடை விதித்துள்ளது.

சென்னையை சேர்ந்த சினிமா வினியோகஸ்தர் ரவிச்சந்திரன் உயர்நீதிமன்றத்தில் மனு ஒன்றை தாக்கல் செய்தார். அதில், 1998ம் வருடம், ஓ.கே.பிலிம்ஸ் உரிமையாளர் மணியிடமிருந்து 100 படங்களுக்கான விசிடி தயாரிக்கும் உரிமையை வாங்கியுள்ளேன். இதற்காக பெரும் தொகையை கொடுத்து ஒப்பந்தம் செய்துள்ளேன்.

இந்த படங்களின் நெகட்டிவ் மற்றும் காப்பி ரைட் உரிமையும் எனக்கு வழங்கப்பட்டுள்ளது. அதில் சிவாஜி நடித்த மனோகரா, ரஜினி நடித்த பொல்லாதவன், கமல் நடித்த சிம்லா ஸ்பெஷல், விஜயகாந்த் நடித்த தெற்கத்தி கள்ளன், ராமராஜன் நடித்த எங்க ஊரு பாட்டுகாரன் போன்ற படங்களும் அடங்கும்.

ஜெமினி லேப், விஜயா லேப், ஏவிஎம் லேப் ஆகியவை இதை உறுதி செய்து உரிமம் வழங்கியுள்ளன.

இந்த நிலையில் மாடர்ன் சினிமா பங்குதாரர் ஜெகநாதன் என்பவர் எனக்கு தெரியாமல் இந்த படங்களின் விசிடிக்களை தயாரித்து வெளியிட்டுள்ளார். இதற்கு தடை விதிக்க வேண்டும் என கூறியிருந்தார்.

வழக்கை விசாரித்த நீதிபதி ராமசுப்ரமணியம், 100 படங்களின் விசிடிக்களை வெளியிட தடை விதித்து, வழக்கை வரும் ஜூன் 11ம் தேதி வரை ஒத்திவைத்தும் உத்தரவிட்டார்.