பெங்களூரில் நாய்கள் கடித்து 4 வயது சிறுவன் பலி

பெங்களூரூ:பெங்களூர் அருகே மீண்டும் நாய்கள் குதறியெடுத்ததில் 4 வயது சிறுவன் பரிதாபமாக பலியானான்.

முதல்வர் குமாரசாமியின் தொகுதிக்கு உட்பட்ட ராமநகரம் பகுதியில் இந்த கொடூர சம்பவம் நடந்துள்ளது.

பெங்களூரில் தெரு நாய்களின் வெறிக்கு சிறுவர், சிறுமியர் பலியாவது அதிகரித்து வருகிறது. ஏற்கனவே ஒரு சிறுவனும், சிறுமியும் தெருவில் சுற்றித் திரியும் வெறி நாய்களில் சிக்கி உடல் அக்குவேறாக்கப்பட்டு பலியாயினர்.

இதையடுத்து இந்த தெரு நாய்களை ஒழித்துக் கட்ட முயற்சிகள் தொடங்கின. ஆனால், அதற்கு மிருக வதைத் தடுப்பு அமைப்பினர் கடும் எதிர்ப்புத் தெரிவித்ததால், அந்தப் பணி பாதிக்கப்பட்டது.

இப்போது நாய்களைப் பிடித்துக் கொண்டு போய் ஊசி போட்டு, திரும்பவும் பிடித்த இடத்திலேேய கொண்டு வந்துவிடும் அவலம் நடக்கிறது.

இந் நிலையில் ராம்நகர் பகுதியில் மாமிச கடையின் முன் எறியப்பட்டிருந்த சில துண்டுகளுக்காக தெரு நாய்கள் சண்டை போட்டுக் கொண்டிருந்தன.

அப்போது அந்த இடத்தில் சிறுநீர் கழிக்கச் சென்ற யாசின் என்ற சிறுவனை நாய்கள் சூழ்ந்து கொண்டு கடித்து குதறின. இதில் சிறுவன் சம்பவ இடத்திலேயே உயிரிழந்தான்.

இந்த ராம்நகர் பகுதி முதல்வர் குமாரசாமியின் தொகுதிக்குட்பட்டது என்பது குறிப்பிடத்தக்கது.