இசையமைப்பாளர் எல்.வைத்யநாதன் மரணம்
சென்னை:பிரபல வயலின் கலைஞரும், இசையமைப்பாளருமான எல்.வைத்தியநாதன் மரணமடைந்தார். அவருக்கு வயது 65.
வயலின் இசை மேதையான லட்சுமிநாராயணாவின் மூத்த புதல்வர்தான் வைத்தியநாதன். இவரது சகோதரர்கள் எல்.சுப்ரமணியம், எல்.சங்கர் ஆகியோரும் வயலின் கலைஞர்கள்தான்.
தமிழ், கன்னடம், மலையாளம், இந்தி ஆகிய மொழிகளில் 160க்கும் மேற்பட்ட படங்களுக்கு வைத்தியநாதன் இசையமைத்துள்ளார்.
தமிழில் இவர் இசையமைத்த ஏழாவது மனிதன் படத்துக்காக பல விருதுகளை பெற்றார். இப்படத்தில் முழுக்க முழுக்க பாரதியாரின் பாடல்கள் மட்டுமே இடம் பெற்றது குறிப்பிடத்தக்கது.
அதேபோல கமல்ஹாசன் நடித்த பேசும் படம் படத்திற்கும் வைத்தியநாதன்தான் இசையமைத்திருந்தார். இதேபோல மால்குடி டேஸ் டிவி தொடருக்கும் வைத்தியநாதன் இசையமைத்திருந்தார்.
தமிழக அரசின் கலைமாமணி உள்ளிட்ட பல விருதுகளை வென்றுள்ளார் வைத்தியநாதன். 65 வயதாகும் வைத்தியநாதனுக்கு நேற்று காலை மாரடைப்பு ஏற்பட்டது. உடனடியாக மருத்துவமனைக்குக் கொண்டு செல்லப்பட்டார். அங்கு சிகிச்சை பலனளிக்காமல் இறந்தார்.
வைத்தியநாதனுக்கு மனைவி, இரு மகன்கள் உள்ளனர்.