அறிவாலயத்தில் கலைஞர் டிவி அலுவலகம் திறப்பு

சென்னை:திமுக தலைமை அலுவலகமான அண்ணா அறிவாலயத்தில் கலைஞர் டிவியின் அலுவலகம் தொடங்கப்பட்டுள்ளது.

சன் டிவியுடனான உறவை திமுக முறித்துக் கொண்டு விட்ட நிலையில், புதிதாக கலைஞர் டிவியைத் தொடங்குகிறது திமுக. ராஜ் டிவியின் உதவியுடன் தொடங்கப்படும் கலைஞர் டிவி குறித்த முழுமையான, அதிகாரப்பூர்வமான அறிவிப்பு முதல்வர் கருணாநிதியின் பிறந்த நாளான ஜூன் 3ம் தேதி வெளியாகவுள்ளது.

இந்த நிலையில், கலைஞர் டிவிக்கான அலுவலகம் அண்ணா அறிவாலய வளாகத்தில் தொடங்கப்பட்டுள்ளது. அறிவாலயத்தில் உள்ள முரசொலி மாறன் வளாகத்திற்கு அருகே உள்ள அறையில் டிவிக்கான அலுவலகம் திறக்கப்பட்டுள்ளது.

அலுவலகத்திற்கு கலைஞர் தொலைக்காட்சி அலுவலகம் என பெயர் சூட்டப்பட்டுள்ளது.

ஏற்கனவே சன் டிவியை அறிவாலய வளாகத்திலிருந்து காலி செய்யுமாறு திமுக தலைமை உத்தரவிட்டுள்ளதாக கூறப்படுகிறது. தற்போது போதிய இட வசதி இல்லாததால், சன் டிவியால் அறிவாலயத்திலிருந்து இடம் மாற முடியாத நிலை ஏற்பட்டுள்ளது. விரைவில் சொந்த கட்டடடத்திற்கு அவர்கள் இடம் மாறிச் செல்லக் கூடும் என்று எதிர்பார்க்கப்படுகிறது.

சன் டிவி இடத்தைக் காலி செய்ததும் அங்கு கலைஞர் தொலைக்காட்சி குடிபுகும் எனத் தெரிகிறது.