அதிமுக வேட்பாளர் டாக்டர் மைத்ரேயனுக்குசொந்த வீடு இல்லை.., குவாலிஸ் உண்டு

சென்னை:அதிமுக சார்பில் ராஜ்யசபா தேர்தலில் போட்டியிடும் வேட்பாளர்களின் சொத்து விவரம் அறிவிக்கப்பட்டுள்ளது. டாக்டர் மைத்ரேயன் தனக்கு சொந்த வீடு, நிலம் இல்லை, ஆனால் குவாலிஸ் கார் உள்ளிட்ட பல சொத்துக்கள் இருப்பதாக தெரிவித்துள்ளார்.

ராஜ்யசபா தேர்தலில் அதிமுக சார்பில் போட்டியிடும் டாக்டர் மைத்ரேயன், ஆ.இளவரசன் ஆகியோர் நேற்று வேட்பு மனு தாக்கல் செய்தனர். தங்களின் சொத்துக்கள் குறித்த விவரத்தையும் தேர்தல் ஆணையத்தில் தாக்கல் செய்துள்ளனர்.

டாக்டர் மைத்ரேயனின் சொத்துக்கள் குறித்த விவரம்

என் மீது எந்த வழக்கும் காவல் நிலையத்தில் இல்லை. எந்தக் குற்ற வழக்கிலும் சம்பந்தப்படவில்லை. ரூ. 90 ஆயிரம் ரொக்கப் பணம் வைத்துள்ளேன்.

பெசன்ட் நகரில் உள்ள ஆந்திரா வங்கியில் ரூ. 11,773 பணம் உள்ளது. டெல்லி நாடாளுமன்ற வளாகத்தில் உள்ள பாரத ஸ்டேட் வங்கியில் ரூ. 1,932 இருக்கிறது.

இந்திரபிரஸ்தா மெடிக்கல் கார்ப்பரேஷன் நிறுவனத்தில் ரூ. 6,020 மதிப்புள்ள 200 பங்குகள் உள்ளன. ஸ்ரீசாயிராம் ஆர்ட்ஸ் நிறுவனத்திடம் தமிழ்ப் படம் ஒன்றின் உரிமைக்காக ரூ. 5 லட்சம் பணம் அட்வான்ஸ் கொடுத்துள்ளேன்.

ரூ. 6 லட்சத்து 37 ஆயிரத்து 260 மதிப்புள்ள டயோட்டா குவாலிஸ் ஏசி கார் வைத்துள்ளேன். ரூ. 1 லட்சம் மதிப்புள்ள எல்.ஐ.சி பாலிசி உள்ளது. 60 கிராம் தங்க நகைகள் (மதிப்பு ரூ. 48,000) உள்ளன.

கடந்த நிதியாண்டில் ரூ. 51,000 அளவுக்கு வருமான வரி கட்டியுள்ளேன். எம்.பி.பி.எஸ்., எம்.டி பட்டம் வாங்கியுள்ளேன். சொந்தமாக வீடு, நிலம் கிடையாது என்று கூறியுள்ளார் டாக்டர் மைத்ரேயன்.

ஆ. இளவரசன் தாக்கல் செய்துள்ள சொத்துக் குறிப்பில், கையில் ரொக்கமாக ரூ. 30,000 பணம் உள்ளது. மனைவி புவனேஸ்வரி பெயரில் ரூ. 20 ஆயிரம் உள்ளது. வங்கி, நிதி நிறுவனங்களில் முதலீடுகள் எதுவும் இல்லை.

மனைவி பெயரில் புத்தூர் கிராமத்தில், ரூ. 15 லட்சம் மதிப்புள்ள வீடு உள்ளது. ரூ. 5000 மதிப்புள்ள இரு சக்கர வாகனம் என்னிடம் உள்ளது. மனைவி பெயரில் காண்டசா கார் உள்ளது. நகை, விவசாய நிலம் கிடையாது.

திருச்சி அண்ணாமலை நகரில் ரூ. 26 லட்சத்து 50 ஆயிரம் மதிப்புள்ள வீடு உள்ளது. பெட்டவாய்த்தலையில் உள்ள வங்கியில் ரூ. 4 லட்சத்து 60 ஆயிரம் ரூபாய் கடன் நிலுவை உள்ளது. எனது பெயரில் தனியாக ரூ. 57 ஆயிரம் கடன் உள்ளது என்று கூறியுள்ளார் இளவரசன்.