கருணாநிதி வாட்ச்: ஆர்வமாய் வாங்கிச் சென்ற அதிமுக எம்எல்ஏக்கள்!!

சென்னை:சட்டசபையில் கலைஞர் பொன்விழாவையொட்டி வழங்கப்பட்ட, முதல்வர் கருணாநிதி உருவப்படம் பொறிக்கப்பட்ட கைக்கடிகாரங்களை அதிமுகவைச் சேர்ந்த 40க்கும் மேற்பட்ட எம்.எல்.ஏக்கள் ஆர்வத்துடன் வாங்கிச் சென்றுள்ளதாக தகவல்கள் வெளியாகியுள்ளன.

சட்டசபை உறுப்பினராக பொன்விழா கண்ட முதல்வர் கருணாநிதியைப் பாராட்டி சட்டசபையில் விழா எடுக்கப்பட்டது. இதையடுத்து பொன்விழா நினைவாக அனைத்து எம்.எல்.ஏக்களுக்கும் முதல்வரின் உருவப் படம் பொறிக்கப்பட்ட தங்க கைக்கடிகாரம், சூட்கேஸ் ஆகியவை பரிசாக வழங்கப்பட்டன.

இவற்றை சட்டசபை பட்ஜெட் கூட்டத் தொடர் முடிவில் திமுக மற்றும் கூட்டணிக் கட்சியினர் வாங்கிச் சென்றனர்.

இந் நிலையில், அதிமுக எம்.எல்.ஏக்களும் பெரும் ஆர்வத்துடன் இந்த பரிசுப் பொருட்களை வாங்கிச் சென்றுள்ளாக தகவல் வெளியாகியுள்ளது. சட்டசபைச் செயலாளர் அறைக்குச் சென்று இவற்றை அவர்கள் வாங்கிச் சென்றுள்ளனர்.

இதுவரை 40க்கும் மேற்பட்ட அதிமுக எம்.எல்.ஏக்கள் இவற்றை வாங்கிச் சென்றுள்ளனராம். ஓ.பன்னீர் செல்வம், ஜெயக்குமார், கே.ஏ.செங்கோட்டையன் உள்ளிட்ட சிலர் மட்டுமே பெறவில்லையாம்.