துணை ஜனாதிபதி: இடதுசாரிகள்வேட்பாளரை நிறுத்தும்-இ.கம்யூ.

ஹைதராபாத்: துணை குடியரசுத் தலைவர் தேர்தலில் இடது சாரிகள் சார்பில் வேட்பாளர் நிறுத்தப்படும் வாய்ப்பு அதிகமாக உள்ளது என்று இந்திய கம்யூனிஸ்ட் பொதுச் செயலாளர் ஏ.பி.பர்தன் கூறியுள்ளார்.

ஹைதராபாத்தில் செய்தியாளர்களிடம் அவர் பேசுகையில், துணை குடியரசுத் தலைவர் வேட்பாளர் தொடர்பாக இடதுசாரிகள் இன்னும் முடிவு எதையும் எடுக்கவில்லை. விரைவில் அதுகுறித்து முடிவு செய்வோம். அதற்கு முன்பாக ஐக்கிய முற்போக்குக் கூட்டணியுடன் கலந்து பேசுவோம்.

இடது சாரிகள் சார்பில் வேட்பாளர் ஒருவரை நிறுத்துவதற்கான வாய்ப்புகளை மறுக்க முடியாது. துணை குடியரசுத் தலைவர் தேர்தலில் காங்கிரஸ் அல்லாத பிற கட்சியைச் சேர்ந்த ஒருவர்தான் வேட்பாளராக அறிவிக்கப்படுவார்.

குடியரசுத் தலைவர் தேர்தல் முடிந்ததும் அதுகுறித்து தீர்மானிக்கப்படும் என்றார் பர்தன்.