துணை ஜனாதிபதி பதவியிலிருந்து விலகினார் ஷெகாவத்

டெல்லி:குடியரசுத் தலைவர் தேர்தலில் போட்டியிட்டுத் தோல்வியுற்ற துணை குடியரசுத் தலைவர் பைரான் சிங் ஷெகாவத் அப்பதவியிலிருந்து ராஜினாமா செய்துள்ளார்.

தேசிய ஜனநாயகக் கூட்டணியின் ஆதரவுடன் குடியரசுத் தலைவர் தேர்தலில் சுயேச்சையாகப் போட்டியிட்டார் ஷெகாவத். அவருக்கு பாஜக கூட்டணி மட்டுமே ஆதரவு தெரிவித்தது. 3வது அணி கடைசி வரை ஆதரவு தெரிவிக்கவில்லை.

இருப்பினும் 3வது அணியில் இடம் பெற்றிருந்த அதிமுகவும், மதிமுகவும் கடைசி நேரத்தில் ஜெயலலிதா அடித்த அந்தர் பல்டியால், ஷெகாவத்துக்கு ஆதரவாக வாக்களித்தன. அப்படியும் கூட அதிமுக மற்றும் மதிமுகவைச் சேர்ந்த நான்கு பேர் பிரதீபாவுக்கு ஆதரவாக வாக்களித்துள்ளது தற்போது தெரிய வந்துள்ளது.

தேர்தலில் தோல்வியைத் தழுவிய ஷெகாவத் தனது துணை குடியரசுத் தலைவர் பதவியை ராஜினாமா செய்துள்ளார். முன்னதாக பிரதீபா பாட்டீலுக்கு தொலைபேசி மூலம் வாழ்த்து தெரிவித்தார் ஷெகாவத்.

பின்னர் குடியரசுத் தலைவர் மாளிகைக்குச் சென்ற ஷெகாவத் தனது ராஜினாமா கடிதத்தை குடியரசுத் தலைவர் அப்துல் கலாமிடம் வழங்கினார்.

ஷெகாவத், கலாமிடம் கொடுத்த ராஜினாமா கடிதத்தில், எனது பதவிக்காலத்தில் உங்களிடமிருந்து நான் பெற்ற ஆலோசனைகளுக்கும், நீங்கள் அளித்த ஒத்துழைப்புக்கும் நான் மிகவும் கடமைப்பட்டுள்ளேன் என்று கூறியிருந்தார் ஷெகாவத்.

அதன் பின்னர் தனக்கு வழங்கப்பட்டிருந்த அரசு காரை குடியரசுத் தலைவர் மாளிகையிலேயே ஒப்படைத்தார். பிறகு தனது காரில் வீடு திரும்பினார்.

முன்னதாக ஷெகாவத் வெளியிட்ட அறிக்கையில், எனது தோல்வியை நான் பணிவுடன் ஏற்றுக் கொள்கிறேன். ஏழைகள் உயர்வுக்காகவும், சிலரால் தங்களது உரிமைகளை இழந்தவர்கள் அவர்களது அடிப்படை உரிமைகளை கெளரவத்துடன் பெறவும் தொடர்ந்து பாடுபடுவேன்.

நான் பணியாற்றிய காலம் முழுவதும் நாட்டு மக்கள் அளவிட முடியாத அன்பும், ஆதரவும் அளித்ததற்காக நன்றி செலுத்தக் கடமைப்பட்டுள்ளேன்.

எனக்கு வாக்களித்த அனைத்து எம்.பிக்களுக்கும், எம்.எல்.ஏக்களுக்கும் நன்றி தெரிவித்துக் கொள்கிறேன். பத்திரிக்கையாளர்களுக்கும் எனது நன்றிகளைத் தெரிவித்துக் கொள்கிறேன் என்று கூறியிருந்தார் ஷெகாவத்.

துணை குடியரசுத் தலைவர் பதவியை ஷெகாவத் ராஜினாமா செய்த பின்னர் அவரை அவரது வீட்டில் பாஜக தலைவர்கள் ராஜ்நாத் சிங், அத்வானி, முரளி மனோகர் ஜோஷி உள்ளிட்டோர் சந்தித்தனர்.