எல்காட் வசம் தமிழக அரசு கேபிள் டிவி நிறுவனம்?

சென்னைதமிழக அரசு திட்டமிட்டுள்ள கேபிள் டிவி கட்டமைப்பு நிறுவனத்தை எல்காட் நிறுவனம் ஏற்று நடத்தவுள்ளதாக தெரிகிறது. இது தொடர்பான ஆய்வறிக்கையை எல்காட் நிறுவனம் அரசிடம் வழங்கியுள்ளது.

கடந்த அதிமுக ஆட்சியில், கேபிள் டிவி நிறுவனங்களை கையகப்டுத்தி அரசே கேபிள் டிவியை நடத்த சட்டத் திருத்தம் கொண்டு வரப்பட்டது. ஆனால் இதை திமுக கடுமையாக எதிர்த்தது.

இந்த நிலையில் சமீபகாலமாக கேபிள் டிவியை தமிழக அரசே ஏற்று நடத்த வேண்டும் என பாமக கோரி வருகிறது. இதையடுத்து பாமக நிறுவனர் ராமதாஸிடம், தமிழக அரசு ஆலோசனை கேட்டது.

இதைத் தொடர்ந்து அரசே கேபிள் டிவி நிறுவனத்தைத் தொடங்கி நடத்த தீர்மானிக்கப்பட்டுள்ளது. இதுதொடர்பான ஆய்வு நடந்து வருவதாகவும் முதல்வர் கருணாநிதி தெரிவித்திருந்தார்.

இந்த நிலையில் தமிழக அரசு திட்டமிட்டுள்ள கேபிள் டிவி நிறுவனத்தை அரசின் எல்காட் நிறுவனமே நடத்தும் எனத் தெரிகிறது. அரசின் கேபிள் டிவி திட்டம் தொடர்பான சாத்தியக்கூறுகள் குறித்த திட்ட அறிக்கையை அரசிடம் எல்காட் அதிகாரிகள் வழங்கியுள்ளனர்.

இதுகுறித்து எல்காட் நிறுவன அதிகாரிகள் கூறுகையில், கடந்த ஒரு ஆண்டில் தமிழகம் முழுவதும் உள்ள 17 ஆயிரம் வருவாய் கிராமங்களை இணைக்கும் வகையில், ஆப்டிக்கல் பைபர் கேபிள்கள் போடப்பட்டுள்ளன. இதன் மூலம் கேபிள் டிவி ஒளிபரப்பை நடத்த முடியும்.

இந்த கேபிள்கள் மூலம், தொலைபேசி, இன்டர்நெட் மற்றும் கேபிள் டிவியை ஒரே நேரத்தில் வழங்கலாம்.

மேலும் இந்த திட்டத்தை விரைவாகவும், துல்லியமாகவும் செயல்படுத்த தனியார் தொலைத் தொடர்பு நிறுவனங்களின் உதவியையும் நாட திட்டமிடப்பட்டுள்ளது என்று தெரிவித்தனர்.

விரைவில் இதுதொடர்பாக தமிழக அரசு அதிகாரப்பூர்வ அறிவிப்பை வெளியிடும் எனத் தெரிகிறது.