தமிழ்நாடு எக்ஸ்பிரஸ் தடம் புரண்டது:திருப்பதி, கோவை ரயில்கள் நேரம் மாற்றம்

சென்னை:சென்னை அருகே தமிழ்நாடு எக்ஸ்பிரஸ் ரயில் நேற்றிரவு தடம் புரண்டது. இதனால் ரயில் போக்குவரத்து பல மணி நேரம் பாதிக்கப்பட்டது. மேலும் 4 ரயில்களின் நேரம் இன்றும் மாற்றியமைக்கப்பட்டுள்ளது.

சென்னையில் இருந்து டெல்லி செல்லும் தமிழ்நாடு எக்ஸ்பிரஸ் ரயில் நேற்றிரவு 10 மணியளவில் பேசின் பிரிட்ஜ் அருகே தடம் புரண்டது.

இதனால் அந்த வழியாக செல்ல வேண்டிய ரயில்கள் அனைத்தும் நிறுத்தப்பட்டன. சுமார் 5 மணி நேரத்துக்குப் பின்னரே தடம் புரண்ட இரண்டு பெட்டிகளும் அப்புறப்படுத்தப்பட்டன.

இதனால் ஏற்காடு, நீலகிரி எக்ஸ்பிரஸ் ரயில்கள் உள்பட பல ரயில்கள் தாமதமாகக் கிளம்பிச் சென்றன.

இதனால் பயணிகள் பெரும் சிரமத்துக்கு உள்ளாயினர்.

இன்றும் 4 ரயில்கள் நேரம் மாற்றம்:

இந் நிலையில் சென்டரலில் இருந்து இன்று பகல் 1.50க்கு கிளம்ப வேண்டிய திருப்பதி எக்ஸ்பிரஸ் (எண்-6053) மாலை 4.30க்குக் கிளம்பிச் சென்றது.

சென்னை-ஆலப்புழா எக்ஸ்பிரஸ் (6042) மாலை 4.10க்குப் பதிலாக மாலை 6.30க்குப் புறப்பட்டது.

அதே போல சென்னை-காக்கிநாடா சிர்கார் எக்ஸ்பிரஸ் (எண்-6043) மாலை 5.45க்குப் பதிலாக இரவு 8.30 மணிக்குப் புறப்படும்.

மேலும் கோவை-சென்னை செல்லும் கோவை எக்ஸ்பிரஸ் (எண்-2676) பகல் 2.05க்குப் பதிலாக இரவு 8 மணிக்குப் புறப்படும் என தென்னக ரயில்வே அறிவித்துள்ளது.