சேது திட்டத்துக்கு பார்வர்ட் பிளாக் ஆதரவு

சென்னை: தேசிய அளவில், காங்கிரஸ் - பாஜகவுக்கு மாற்றாக, இடதுசாரிகள் தலைமையில் புதிய தேசதிய கூட்டணி உருவாகும் வாய்ப்பு அதிகரித்துள்ளது என்று பார்வர்ட் பிளாக் கட்சியின் அகில இந்திய பொதுச் செயலாளர் பிஸ்வாஸ் கூறியுள்ளார்.

சென்னை வந்த பிஸ்வாஸ் நேற்று செய்தியாளர்களைச் சந்தித்தார். அவருடன் தமிழக பார்வர்ட் பிளாக் கட்சித் தலைவர் நடிகர் கார்த்திக்கும் உடன் இருந்தார்.

பிஸ்வாஸ் பேசுகையில், அணு சக்தி ஒப்பந்தத்தை இடதுசாரிகளின் எதிர்ப்பையும் மீறி மத்திய அரசு நிறைவேற்ற முயன்றால், கண்டிப்பாக இடைத் தேர்தலை சந்தித்தே ஆக வேண்டும்.

நாட்டில் நிலவும் அரசியல் நிலவரத்தைப் பார்க்கும்போது, தேசிய அளவில் பாஜக, காங்கிரஸ் கூட்டணிக்கு மாற்றாக, இடதுசாரிகளைத் தலைமையாகக் கொண்டு ஒரு புதிய அணி உருவாகும் வாய்ப்புகள் சாதகமாக உள்ளன. இரு கட்சிகளுக்கும் மாறான கூட்டணி கண்டிப்பாக உருவாகும்.

சேது சமுத்திரத் திட்டம் தமிழகத்திற்கு மட்டுமல்லாமல் நாட்டுக்கும் நல்லது. இதை இறைவனின் பெயரால் தடுத்து நிறுத்த முயல்வது தவறானது. இந்தத் திட்டம் நிறைவேற பார்வர்ட் பிளாக் கட்சி முழுமையாக பாடுபடும் என்றார் பிஸ்வாஸ்.