மசூதியில் ஷூட்டிங்-மன்னிப்பு கேட்டார் சானியா
ஹைதராபாத்: ஹைதராபாத், மெக்கா மசூதியில் அனுமதி பெறாமல் எடுக்கப்பட்ட விளம்பரப் படத்தில் நடித்ததற்காக வருத்தம் அடைவதாகவும், இதற்காக தன்னை மன்னித்து விடுமாறும் சானியா மிர்ஸா கூறியுள்ளார்.சில வருடங்களுக்கு முன்பு கவர்ச்சிகரமான உடை அணிந்து ஆடுவதாக சானியா மீது முஸ்லீம் அமைப்பினர் சர்ச்சையைக் கிளப்பினர். இந்த நிலையில் சானியா மீண்டும் சர்ச்சையில் சிக்கியுள்ளார்.
ஹைதராபாத் நகரின் மையப் பகுதியில் அமைந்துள்ளது மெக்கா மசூதி. கடந்த 17ம் நூற்றாண்டில் கட்டப்பட்ட மிகப் பழமையான மசூதி. இந்த மசூதியில் சில நாட்களுக்கு முன்பு சானியா நடித்த விளம்பரப் படத்தின் ஷூட்டிங் நடந்தது.
மெக்கா மசூதியில் இதுபோன்ற ஷூட்டிங்குகளுக்கு அனுமதி வழங்கப்படுவதில்லை. ஆனால் சானியா நடித்த விளம்பரப் படத்தின் ஷூட்டிங்குக்கு அனுமதி பெறவில்லை. உரிய அனுமதி பெறாமலேயே ஷூட்டிங் நடந்ததால் பரபரப்பு ஏற்பட்டது.
இந்த விளம்பரப் பட ஷூட்டிங்குக்கு பல்வேறு முஸ்லீம்கள் கண்டனம் தெரிவித்துள்ளன. மெக்கா மசூதி நிர்வாகமும் சானியாவைக் கண்டித்துள்ளது. சானியா மீது வழக்கும் தொடரப்பட்டுள்ளது.
பிரச்சினை வலுத்து வருவதைத் தொடர்ந்து தனது செயலுக்கு வருத்தம் தெரிவிப்பதாகவும், இதுபோல நடந்து கொண்டதால் யாரேனும் மனம் புண்பட்டிருந்தால் தன்னை மன்னித்து விடுமாறும் சானியா கூறியுள்ளார்.