புதிதாய் முளைத்த அரசியல் நடிகர்கள்-அழகிரி

மதுரை: தமிழக முதல்வரின் நல்ல திட்டங்களை புதிதாக அரசியலில் முளைத்துள்ள நடிகர்களால் பொறுத்துக் கொள்ள முடியவில்லை. இதனால்தான் அவற்றை எதிர்ப்பதுடன், எந்த நல்ல திட்டமும் நிறைவேறிவிடக் கூடாது என்பதே அவர்களின் எண்ணமாக இருக்கிறது என மு.க.அழகிரி கூறியுள்ளார்.

மதுரையில் செய்தியாளர்களிடம் அவர் கூறுகையில், பொங்கலுக்கு இலவச வேட்டி, சேலை வழங்கப்படுவதுடன், இலவச கலர் டிவி, இலவச சமையல் கேஸ் அடுப்பு போன்றவையும் கிடைக்கிறது. முதல்வர் கருணாநிதி இதேபோல இன்னும் பல நல்ல திட்டங்களை நிறைவேற்றி சாதனை படைப்பார்.

இதையெல்லாம் புதிதாக அரசியலில் முளைத்துள்ள நடிகர்களால் பொறுத்துக் கொள்ள முடியாமல் எதிர்க்கின்றனர். எந்த நல்ல திட்டமும் நிறைவேறிவிடக் கூடாது என்பதே அவர்களின் எண்ணம்.

முதல்வர் கருணாநிதி நூறாண்டுகள் வாழ்ந்து முதல்வராகவும், தலைவராகவும் இருந்து, தமிழக மக்களுக்கு நல்லது செய்து சாதனை படைப்பார்.

சினிமா பாடலில் டி.எம். சவுந்திரராஜன் சாதனை படைத்தார். அவரை பாராட்ட கலை உலகம் மறந்தாலும், முதல்வர் கருணாநிதி மறக்கவில்லை. மதுரையில் பிரம்மாண்டமான முறையில் டி.எம். சவுந்திரராஜனுக்கு பாராட்டு விழா நடைபெறும். மார்ச் இறுதி அல்லது ஏப்ரலில் மதுரை தமுக்கம் மைதானத்தில் நடைபெறும் விழாவில் முதல்வர் பங்கேற்பார்.

தென் மாவட்டங்களில் தொழில் வளர்ச்சிக்கு ஏராளமான திட்டங்களை முதல்வர் கருணாநிதி அறிவித்துள்ளார். மதுரை நகரில் மாநகராட்சி மூலம் வைகை 2வது குடிநீர் திட்டம் உட்பட பல்வேறு திட்டங்கள் நிறைவறி வருகின்றன. மதுரை எல்லீஸ் நகர், செல்லூர் மேம்பால பணிகள் விரைவாக நிறைவேற முதல்வருடன் பேசுவேன் என்றார்.