மோடி புண்ணியத்தால் ரூ. 200 கோடி 'வாரிய' டிவிகள்!

டெல்லி: குஜராத்தில் நரேந்திர மோடியை மையமாக வைத்து நடந்த பரபரப்பான தேர்தல் பிரசாரத்தை வைத்து இந்திய டிவி நிறுவனங்கள் சுமார் ரூ. 200 கோடி அளவுக்கு வருவாய் ஈட்டியுள்ளன.

குஜராத் மாநில சட்டசபைக்கு அக்டோபர் 16ம் தேதி முதல் நவம்பர் 16ம் தேதி வரை நடந்த பிரசாரக் காலத்திலும், கருத்துக் கணிப்புகள், தேர்தல் முடிவுகளின்போதும் கிடைத்த விளம்பரங்களை வைத்து இந்த அளவுக்கு இந்திய டிவிக்கள் பணம் ஈட்டியுள்ளன.

குஜராத் தேர்தல் தொடர்பாக 110 டிவிகளில் செய்திகள் மற்றும் விளம்பரங்கள் ஒளிபரப்பாகியுள்ளன.

இந்த கால கட்டத்தில் மொத்தம் 18 லட்சத்து 3 ஆயிரத்து 783 விநாடிகள் (அதாவது 20 நாட்கள்) விளம்பரம் செய்யப்பட்டுள்ளது. மொத்தம் 6,063 கிளிப்பிங்குகள் காட்டப்பட்டுள்ளன.

மொத்தமாக டிவி விளம்பரங்கள் மூலம் கிடைத்துள்ள வருவாய் ரூ. 206 கோடியாகும்.
ஈஷா பிராட்காஸ்ட் மானிட்டரிங் பிரைவேட் லிமிட்டெட் என்ற நிறுவனம் வெளியிட்டுள்ள புள்ளி விவரத் தகவல் இதைத் தெரிவிக்கிறது.

இதில் என்டிடிவிதான் பெரும் லாபத்தைக் கண்டுள்ளது. இந்த டிவி, 2 லட்சத்து 18 ஆயிரத்து 673 விநாடிகளுக்கு விளம்பரங்களை ஒளிபரப்பியது. இதன் மூலம் கிடைத்த வருமானம், ரூ. 39 கோடியாகும். என்டிடிவி இந்தி சேனல் ரூ. 10 கோடி ஈட்டியுள்ளது.

இதைத் தொடர்ந்து சஹாரா சமய் (2,15,342 விநாடிகள் விளம்பரம்- வருவாய் ரூ. 26 கோடி), ஈடிவி குஜராத்தி (1,90,411 விநாடிகள் - வருவாய் ரூ. 19 கோடி), லைவ் இந்தியா (1,30,749 விநாடிகள் - வருவாய் ரூ. 6 கோடி) ஆகியவை லாபம் ஈட்டியுள்ளன.