ராமதாஸ் விழாவில் பாமகவினர் அடிதடி!

புதுக்கோட்டை: புதுக்கோட்டையில் ராமதாஸ் கலந்து கொண்ட விழாவில் பாமக தொண்டர்கள் மோதிக் கொண்டதால் பரபரப்பு ஏற்பட்டது.

புதுக்கோட்டை பாமக செயலாளராக இருந்தவர் தரணி ரமேஷ். இவர் மீது தொடர்ந்து பல புகார்கள் வந்ததால் இவர் அந்த பதவியில் இருந்து நீக்கப்பட்டு புதிய நிர்வாகிகள் நியமிக்கப்பட்டனர்.

இந் நிலையில் புதுக்கோட்டை அருகில் உள்ள கீரமங்கலத்தில் பாமக மாநில மகளிர் சங்கச் செயலாளர் சீத்தா லட்சுமி இல்ல விழாவில் கலந்து கொள்ள பாமக நிறுவனர் டாக்டர் ராமதாஸ் வந்தார்.

தரணி ரமேசும் அந்த விழாவுக்கு வந்திருந்தார். அப்போது குன்னண்டார் கோவில் ஒன்றியச் செயலாளர் மாரிமுத்துவுடன் வந்த சிலரை தரணி ரமேஷின் ஆட்கள் தாக்கினர்.

இதையடுத்து இரு தரப்பினரும் கடுமையாக மோதிக் கொண்டனர். இதில் படுகாயமடைந்த மாரிமுத்துவின் ஆட்கள் புதுக்கோட்டை அரசு மருத்துவமனையில் சேர்க்கப்பட்டனர்.

இது குறித்து கீரமங்கலம் போலீசார் தீவிர விசாரணை நடத்தி வருகின்றனர்.