காரில் தலை மோதி உமாபாரதி காயம்

சத்னா: காரில் தலை மோதியதில் பாரதிய ஜன் சக்தி தலைவர் உமா பாரதி காயமடைந்தார். அவருக்கு தலையில் பலத்த காயம் ஏற்பட்டதால் மருத்துவமனையில் சேர்க்கப்பட்டார்.

நேற்று மத்தியப் பிரதேசத்தில் உள்ள சத்னா நகரில் இருந்து 25 கி.மீ. தூரத்தில் உள்ள கோடார் என்ற இடத்தில் காரில் ஏறியபோது காரின் கதவு திடீரென மூடியது. இதில் உமாவின் தலையில் பலத்த அடி விழுந்தது. மோதிய வேகத்தில் அவருக்கு மயக்கம் ஏற்பட்டது.

இதையடுத்து அவர் மருத்துவமனைக்கு கொண்டு செல்லப்பட்டார். அங்கு தீவிர சிகிச்சைப் பிரிவில் சேர்க்கப்பட்டார்.

இந் நிலையில் இன்று அவர் டிஸ்சார்ஜ் செய்யப்பட்டார். மருத்துமனையில் இருந்து அரசு விருந்தினர் மாளிகைக்கு வந்த அவர் யாரிடமும் பேசவில்லை. கேட்டதற்கு, அவர் மெளன விரதம் இருப்பதாகக் கூறப்பட்டது.