முதல்வர் கருணாநிதியின் டெல்லி பயணம் திடீர் ரத்து

சென்னை: முதல்வர் கருணாநிதி இன்று மேற்கொள்ளவிருந்த டெல்லி பயணம் திடீரென ரத்து செய்யப்பட்டது. முதல்வருக்குப் பதில் கல்வி அமைச்சர் அன்பழகன் டெல்லி செல்கிறார்.

முதல்வர் கருணாநிதி இன்று பிற்பகல் 1.30 மணி விமானத்தில் டெல்லி செல்வதாக இருந்தார்.

நாளை மத்திய திட்டக் குழுத் துணைத் தலைவர் எம்.எஸ்.அலுவாலியாவுடன் தமிழகத்திற்கு இந்த ஆண்டுக்கான திட்ட ஒதுக்கீடு குறித்து பேச்சுவார்த்தை நடத்த விருந்தார்.

மேலும், பிரதமர் மன்மோகன் சிங், காங்கிரஸ் தலைவர் சோனியா காந்தி, மனித வள மேம்பாட்டுத்துறை அமைச்சர் அர்ஜூன் சிங் ஆகியோரையும் சந்திக்கவும் அவர் திட்டமிட்டிருந்தார்.

ஆனால் கடைசி நேரத்தில் முதல்வரின் பயணம் ரத்து செய்யப்பட்டு விட்டது. அவருடைய உடல்நலன் கருதி பயணம் ரத்து செய்யப்பட்டுள்ளது.

கடந்த 2 தினங்களாக சென்னையில் பல்வேறு நிகழ்ச்சிகளில் கலந்து கொண்டதால், முதல்வரை ஓய்வெடுக்கும்படி டாக்டர்கள் அறிவுரை கூறியதால் பயணம் ரத்து செய்யப்பட்டுள்ளதாக தெரிவிக்கப்பட்டுள்ளது.

முதல்வருக்கு பதிலாக நிதி அமைச்சர் க.அன்பழகன் தலைமையில் அதிகாரிகள் குழு டெல்லி செல்கிறது. அவர்கள் திட்டக்கமிஷன் கூட்டத்தில் கலந்து கொண்டு தமிழக திட்டங்களுக்கான நிதி ஒதுக்கீடு குறித்து ஆலோசனை நடத்துவார்கள்.