மகரிஷி மகேஷ் யோகியின் உடல் தகனம்

அலகாபாத்: நெதர்லாந்தில் மரணமடைந்த ஆழ்நிலை தியான குரு, மகரிஷி மகேஷ் யோகியின் உடல் அலகாபாத்தில் இன்று தகனம் செய்யப்பட்டது.

ஆழ்நிலை தியானத்தை மேற்கத்திய நாடுகளில் புகழ் பெறச் செய்த மகரிஷி மகேஷ் யோகி நெதர்லாந்து நாட்டின் விலோடிராப் நகரில் கடந்த 6ம் தேதி (புதன்கிழமை) இயற்கை எய்தினார். அவரின் வயது 91.

அவரது உடல் நெதர்லாந்தில் இருந்து இந்தியாவுக்கு கொண்டுவரப்பட்டது. பின்னர் அலகாபாத்தில் உள்ள இந்துக்கள் புனிதமாக கருதும் சங்கம் என்ற இடத்திற்கு கொண்டு செல்லப்பட்டது.

அங்கு அவரது உடலுக்கு ஆயிரக்கணக்கானோர் இறுதி அஞ்சலி செலுத்தினர். பின்னர் யோகியின் சீடர்கள் மந்திரம் ஓத மகேஷ் யோகியின் உடல் தகனம் செய்யப்பட்டது.