'நானோ'வுக்கு வரிச் சலுகை கிடைக்குமா?

டாடாவின் நானோ காருக்கு வரிச் சலுகை பெற டாடா நிறுவனம் தீவிர முயற்சியில் இறங்கியுள்ளது. இதனால் பட்ஜெட்டில் இது தொடர்பான அறிவிப்பு வெளியாகக் கூடும் என்ற எதிர்பார்ப்பு எழுந்துள்ளது.

இந்த வரிச் சலுகை தொடர்பாக டாடா குழும தலைவர் ரத்தன் டாடா, பிரதமர் மன்மோன் சிங்கை நேரில் சந்தித்துப் பேசியுள்ளார்.

கடந்த 2006ம் ஆண்டு பொது பட்ஜெட்டில், நான்கு மீட்டர் நீளமும், 1200 சி.சி., திறன் (பெட்ரோல்), 1,500 சி.சி. திறன் (டீசல்) கொண்ட கார் தான் சிறிய கார் என வகுக்கப்பட்டிருந்தது.

ஆனால், மத்திய அரசின் ஆட்டோமேடிவ் மிஷன் பாலிசி'யின்படி சிறிய கார் ' என்பது 3.8 மீட்டர் நீளம் கொண்டதாக இருக்க வேண்டும். என்ஜின் திறன் பற்றி அந்த திட்டத்தில் எதுவும் கூறப்படவில்லை.

டாடா நிறுவனம் அறிமுகப்படுத்தியுள்ள நானோ' கார், 2006 பட்ஜெட்டில் கூறியுள்ளபடியும், ஆட்டோமேடிவ் மிஷன் பாலிசி'படியும், சிறிய கார் என்ற அந்தஸ்தை பெற்றுள்ளது.

மேலும், விலையும் 1 லட்சம் என்பதால், பொதுமக்கள் பெருமளவில் பயன்படுத்த கூடிய வாகனம் என்ற அந்தஸ்தையும் பெற உள்ளது.

பாதுகாப்பான சிறிய கார் என்ற அந்தஸ்தை பெற, அனைத்து பாதுகாப்பு மற்றும் சுற்றுசூழல் கட்டுப்பாடுகளின்படி கார் வடிவமைக்கப்பட்டுள்ளது.

எனவே, பாதுகாப்பான சிறிய கார் என்ற அடிப்படையில், நானோ'வுக்கு வரி சலுகைகள் வழங்க வேண்டும் என டாடா நிறுவனம் மத்திய அரசை கோரியுள்ளது.

நானோ'வுக்கு கலால் வரி சலுகை கிடைக்குமா என்பது பட்ஜெட்டில் தெரிய வரும்.