விஸ்கான்சின்: ஓபாமா அபார வெற்றி!

மில்வாகீ (விஸ்கான்சின்): விஸ்கான்சின் மாகாணத்தில் நடந்த பிரைமெரி வாக்கெடுப்பில் ஜனநாயகக் கட்சியின் பாரக் ஓபாமா அபார வெற்றி பெற்றார். தொடர்ச்சியாக அவருக்குக் கிடைத்துள்ள 9வது வெற்றி இது. குடியரசுக் கட்சியின் ஜான் மெக்கெய்னுக்கும் வெற்றி கிடைத்துள்ளது.

தொடர்ந்து 8 மாகாணங்களில் நடந்த பிரைமெரி வாக்கெடுப்பில் வெற்றி பெற்று, ஹில்லாரி கிளிண்டனை நடுநடுங்க வைத்துள்ள பாரக் ஓபாமா இன்று நடந்த விஸ்கான்சின் மாகாண வாக்கெடுப்பிலும் அபார வெற்றியைப் பெற்றுள்ளார்.

இதன் மூலம் ஹில்லாரியை விட பாரக் ஓபாமாவின் நிலை மேலும் வலுப்பட்டுள்ளது. இன்னும் சில மணி நேரங்களில் ஹவாய் மாகாணத்தில் வாக்கெடுப்பு நடைபெறவுள்ளது. இது ஓபாமாவின் சொந்த மாகாணமாகும். இங்குதான் அவர் பிறந்தார். இங்கும் அவருக்கே வெற்றி கிடைக்கும் என எதிர்பார்க்கப்படுகிறது.

விஸ்கான்சினில் ஹில்லாரிக்கு வெற்றி கிடைக்காது என்று ஏற்கனவே கூறப்பட்டு வந்தது. இங்கு ஓபாமாவுக்கு பெருமளவில் ஆதரவு இருப்பதால் ஹில்லாரிக்கு நிச்சயம் வெற்றி கிடைக்காது என்று எதிர்பார்க்கப்பட்டது.

இங்கு மொத்தம் 92 கட்சிப் பிரதிநிதிகள் உள்ளனர். இவர்களில் 18 பேர் சூப்பர் பிரதிநிதிகள் ஆவர்.

இந்த வாக்கெடுப்புக்குப் பின்னர் ஓபாமாவின் பிரதிநிதிகள் வாக்கு எண்ணிக்கை 1281 ஆக உயர்ந்துள்ளது. ஹில்லாரிக்கு 1218 வாக்குகளே உள்ளன.

குடியரசுக் கட்சியின் சார்பில் போட்டியிடும் ஜான் மெக்கெய்னுக்கும் விஸ்கான்சின் ஆதரவாக வாக்களித்துள்ளது. அக்கட்சியின் சார்பில் மெக்கெய்ன் வேட்பாளராக தேர்வு செய்யப்படுவதற்கான வாய்ப்புகள் இதன் மூலம் மேலும் அதிகரித்துள்ளது.