23 உருது ஆசிரியர்கள் நியமனம்

சென்னை: சென்னை மாநகராட்சியின் தொடக்கப் பள்ளிகளில் 23 உருது ஆசிரியர்களுக்கான பணி நியமன உத்தரவை உள்ளாட்சித் துறை அமைச்சர் மு.க.ஸ்டாலின் வழங்கினார்.

சென்னை மாநகராட்சியின் கீழ் 19 உருது தொடக்கப்பள்ளி மற்றும் நடுநிலைப்பள்ளிகள் இயங்கி வருகின்றன. இப்பள்ளிகளில் 2,356 மாணவ-மாணவியர்கள் பயின்று வருகின்றனர். இந்த பள்ளிகளில் 36 உருது மொழி ஆசிரியர்கள் பணிபுரிகின்றனர்.

கடந்த 1997-ம் ஆண்டு சென்னை மாநகராட்சி மேயராக, மு.க.ஸ்டாலின் இருந்த பொழுது மாநகராட்சி உருது பள்ளிகளுக்கு 27 இடைநிலை ஆசிரியர்கள் நியமிக்கப்பட்டார்கள். கடந்த கால அ.தி.மு.க. ஆட்சியில் மாநகராட்சி உருது பள்ளிகளில் ஆசிரியர்கள் நியமிக்கப்படவில்லை.

தற்போது சென்னை மாநகராட்சி உருது தொடக்கப்பள்ளி மற்றும் நடுநிலைப்பள்ளிகளில் பயிலும் உருதுமொழி வழி கல்வி பயிலும் மாணவ-மாணவியர்களின் கல்வி நலனை உயர்த்திடும் வகையில் மாணவ-மாணவியர்களின் எண்ணிக்கைக்கு ஏற்ப 23 உருதுமொழி வழி இடைநிலை ஆசிரியர்கள் வேலைவாய்ப்பகம் வழியாக இனவாரி சுழற்சியின் அடிப்படையில் ரூ.4,500-125-7,000 என்ற ஊதிய விகிதத்தில் உடனடியாக நிரப்புவதற்கு சென்னை மாநகராட்சி நடவடிக்கை எடுத்தது.

அதன்படி, நேற்று சென்னை கோட்டையில் நடந்த நிகழ்ச்சியில், சென்னை மாநகராட்சி உருது பள்ளிகளுக்கு 23 இடைநிலை ஆசிரியர்களுக்கான பணி நியமன ஆணைகளை ஊரக வளர்ச்சி மற்றும் உள்ளாட்சித்துறை அமைச்சர் மு.க.ஸ்டாலின் வழங்கி வாழ்த்து தெரிவித்தார்.

மேலும், தமிழக அரசின் ஆணைப்படி சென்னை மாநகராட்சி தொடக்க மற்றும் நடுநிலைப்பள்ளிகளில் 75 தமிழ்வழி இடைநிலை ஆசிரியர்கள் மற்றும் 8 உடற்கல்வி ஆசிரியர்கள் வேலை வாய்ப்பகம் வழியாக இனவாரி சுழற்சியின் அடிப்படையில் உடனடியாக நிரப்புவதற்கும் சென்னை மாநகராட்சி நடவடிக்கை மேற்கொண்டு வருகிறது என்று தெரிவிக்கப்பட்டிருந்தது.