வருகிறது 'ஷாப்பிங் பிரா'!!!
டெல்லி: ஷாப்பிங் செல்ல எடுத்துச் செல்லும் பைகள் வடிவிலான நூதன பிராவை, ஸ்விட்சர்லாந்தைச் சேர்ந்த ட்ரூய்ம்ப் இன்டர்நேஷனல் நிறுவனம் வடிவமைத்துள்ளது.ஸ்விட்சர்லாந்தைச் சேர்ந்த ட்ரூய்ம்ப் இன்டர்நேஷனல் என்ற நிறுவனம் பெண்களின் உள்ளாடைகளை வடிவமைக்கும் பிரபல நிறுவனம் ஆகும். இந்த நிறுவனம் விதம் விதமான, வித்தியாசமான பிரா வகைகளை அறிமுகப்படுத்தியுள்ளது.
ஈகோ குளோப், மை சாப்ஸ்டிக்ஸ் பிரா, தி வார்ம் பிஸ், ரீசைக்கிள் பெட் என்பவை இந்த புதிய வகை பிராக்கள். இதில் மை சாப்ஸ்டிக்ஸ் பிரா என்பது படு வித்தியாசமானதாக உள்ளது. இதை ஷாப்பிங் பிரா என்று இந்த நிறுவனம் செல்லப் பெயரிட்டுள்ளது.
மை சாப்ஸ்டிக்ஸ் பிராவில் சீனாவின் உணவருந்தும் குச்சிகளை ஒரு பக்கம் வைக்கக் கூடிய வகையில் இட வசதி கொண்டது.
போகும் இடத்தில் குச்சியைத் தேடிக் கொண்டிருக்க வேண்டியதில்லை. நம்முடனேயே இந்த குச்சியையும் கொண்டு போகலாம்.
ரீசைக்கிள் செய்யப்பட்ட மரக் குச்சிகள் இவை. குச்சிகள் உடலுடன் உரசாத வகையில், மிகவும் கவனத்துடன் இந்த பிரா டிசைன் செய்யப்பட்டுள்ளதாம்.
இந்த பிராவைத் தொடர்ந்து பெண்களின் பான்டீஸ் உள்ளிட்ட பிற உள்ளாடைகளையும் விதம் விதமாக வடிவமைக்க இந்த நிறுவனம் திட்டமிட்டுள்ளது. இதற்காக ஒரு போட்டியையும் அது அறிவித்துள்ளது.
இந்தப் போட்டியில் 40க்கும் மேற்பட்ட நாடுளைச் சேர்ந்த உடை வடிவமைப்பு படிப்பைப் பயிலும் மாணவ, மாணவிகள் கலந்து கொள்ளலாம். அனைவரையும் கவரும் வகையிலான, நூதன உள்ளாடைகளை இவர்கள் வடிவமைக்க வேண்டும்.
இதன் இறுதிப் போட்டி பெய்ஜிங்கில் வருகிற ஜூலை மாதம் நடைபெறவுள்ளது. இதில் வெற்றி பெறுவோருக்கு 15 ஆயிரம் யூரோ பரிசாக அளிக்கப்படும்.
மேலும், வெற்றி பெறும் டிசைன், வர்த்தக ரீதியில் தயாரிக்கப்பட்டு அதை டிசைன் செய்த மாணவர் அல்லது மாணவியின் பெயருடன் உலக அளவில் முக்கிய கடைகளில் விற்பனைக்கு விடப்படும் என்று ட்ரூய்ம்ப் இன்டர்நேஷனல் நிறுவனத்தின் இந்தியப் பிரிவு தலைவர் தார்ஸ்டன் அல்லென்ஸ்டைன் கூறியுள்ளார்.