டிவி சானல் தொடங்குகிறது தேமுதிக-விஜயகாந்த் மச்சான் தகவல்

டெல்லி: திமுக, அதிமுக, பாமக, விடுதலைச் சிறுத்தைகள் ஆகிய கட்சிகளைத் தொடர்ந்து தேமுதிகவுக்கும் தனியாக டிவி பிறக்கவுள்ளது. விரைவில் இதுதொடர்பான முறையான அறிவிப்பு வெளியாகும் என தேமுதிக இளைஞர் அணிச் செயலாளரும், கட்சித் தலைவர் விஜயகாந்த்தின் மைத்துனருமான சுதீஷ் அறிவித்துள்ளார்.

தமிழகத்தில் பொழுது போக்குக்காக டிவி ஆரம்பிப்பது போய் இப்போது கட்சிகளுக்காக டிவி ஆரம்பிக்கும் காலம் வந்து விட்டது.

திமுகவுக்கு கலைஞர் டிவி (முன்பு சன் டிவி), அதிமுகவுக்கு ஜெயா டிவி, பாமகவுக்கு மக்கள் டிவி, விடுதலைச் சிறுத்தைகளுக்கு தமிழன் டிவி, காங்கிரஸுக்கு மகா டிவி என கட்சிக்கொரு டிவி உள்ளது. இதுதவிர மற்ற சானல்கள் ஏதாவது ஒரு கட்சிக்கு ஆதரவான டிவியாகவே செயல்பட்டு வருகின்றன. யாருடனும் சேராமல் தனி டிவியாக இருப்பது விஜய் டிவி மட்டுமே.

இந் நிலையில் தேமுதிகவுக்கென ஒரு டிவி பிறக்கிறது. இதுகுறித்து தட்ஸ்தமிழ் முன்பே கூறியிருந்தது. இப்போது அதுகுறித்த அதிகாரப்பூர்வ தகவல் வெளியாகியுள்ளது.

தேமுதிக இளைஞர் அணி செயலாளர் சுதீஷ் இதுகுறித்துக் கூறுகையில், தேமுதிக சார்பில் புதிய டிவி தொடங்கப்படவுள்ளது. இது 24 மணி நேர பொழுது போக்கு சானலாக செயல்படும். செய்திகளுக்கு இந்த டிவியில் முக்கியத்துவம் தரப்படும் என்று கூறியுள்ளார் சுதீஷ்.

புதிய டிவி குறித்த விரிவான, முழுமையான தகவல்கள் விரைவில் வெளியிடப்படும் எனவும் சுதீஷ் தெரிவித்துள்ளார்.

அடுத்து சரத் டிவியா?