டெல்லி-ஷார்ஜா: மார்ச் 31 முதல் ஏர்அரேபியா விமான சேவை

துபாய்: ஐக்கிய அரபு எமிரேட்ஸின் முதலாவது குறைந்த கட்டண விமான நிறுவனமான ஏர் அரேபியா, மார்ச் 31ம் தேதி முதல் டெல்லிக்கு தனது விமான சேவையை தொடங்குகிறது.

இதுகுறித்து இந்த நிறுவனத்தின் வர்த்தகப் பிரிவு தலைவர் ஏ.கே. நிஸார் கூறுகையில், கடந்த மாதம் கோழிக்கோட்டுக்கு எங்களது விமான சேவை தொடங்கியது. அதற்கு கிடைத்த வரவேற்பைத் தொடர்ந்து தற்போது டெல்லிக்கு எங்களது சேவையை விரிவுபடுத்தியுள்ளோம்.

தொடக்கத்தில் வாரம் நான்கு முறை டெல்லிக்கும், ஷார்ஜாவுக்கும் இடையே இந்த விமானம் இயக்கப்படும். மே மாதம் முதல் தினசரி சேவையாக இது மாற்றப்படும் என்றார் நிஸார்.

இந்தியாவில் ஏர் அரேபியாவின் 11வது விமான சேவை இது என்பது குறிப்பிடத்தக்கது. ஏற்கனவே அகமதாபாத், சென்னை, கோவை, பெங்களூர், ஜெய்ப்பூர், கொச்சி, கோழிக்கோடு, மும்பை, நாக்பூர், திருவனந்தபுரம் ஆகிய நகரங்களுக்கு ஏர் அரேபியா தனது விமான சேவையை நடத்தி வருகிறது.