மீண்டும் மலேசிய பிரதமராக பதவியேற்றார் படாவி

கோலாலம்பூர்: ஆளும் கட்சிக்கு மாபெரும் தோல்வி ஏற்பட்ட நிலையிலும் மலேசிய பிரதமராக 2வது முறையாக அப்துல்லா அகமது படாவி இன்று பதவியேற்றுக் கொண்டார்.

மலேசியாவை கடந்த 50 ஆண்டுகளாக ஆண்டும் வரும்
பாரிசன் தேசியக் கூட்டணிக்கு சமீபத்திய தேர்தலில் வரலாறு காணாத சரிவு ஏற்பட்டது.

சாதாரண பெரும்பான்மையுடன் இந்தக் கூட்டணி ஆட்சியைப் பிடித்துள்ளது. இதன்மூலம் அரசியல் சட்டத் திருத்தம் உள்ளிட்ட எந்த முக்கிய மாற்றங்களையும் செய்ய முடியாத ஒரு அரசு அமைந்துள்ளது.

இந்தக் கூட்டணியின் தோல்விக்கு முக்கிய காரணமாக அமைந்த படாவி, தோல்வியைப் பொருட்படுத்தாமல் மீண்டும் பிரதமராக இன்று பதவியேற்றுக் கொண்டார்.

மன்னர் மாளிகையில் பாரம்பரிய முறைப்படி இன்று பதவியேற்பு நிகழ்ச்சி நடந்தது. படாவிக்கும் அமைச்சர்களுக்கும் மன்னர் பதவிப் பிரமாணம் செய்து வைத்தார்.