ஐசிஎல்லை வாங்க மாட்டேன்-அமீர்

மும்பை: நான் கிரிக்கெட்டை நேசிக்கிறேன். ஆனால் ஷாருக்கான் உள்ளிட்ட சினிமா பிரபலங்களைப் போல கிரிக்கெட் அணிகளை விலைக்கு வாங்கும் யோசனை என்னிடம் இல்லை என்று கூறியுள்ளார் அமீர்கான்.

ஐபிஎல் கிரிக்கெட் அணிகளை ஷாருக்கான், ப்ரீத்தி ஜிந்தா, ஜூஹி சாவ்லா போன்ற சினிமா பிரபலங்கள் விலைக்கு வாங்கியது போல ஐசிஎல் அணிகளையும் சில சினிமா பிரபலங்கள் விலைக்கு வாங்கவுள்ளதாக செய்திகள் வெளியாகின.

இன்சமாம் உல் ஹக் தலைமையிலான லாகூர் பாட்ஷா அணியை ஆமிர்கானும், மும்பை சேம்ப்ஸ் அணியை கரீனா கபூரும் விலைக்கு வாங்கப் போவதாகவும் கூறப்பட்டது.

ஆனால் அமீர்கான் இதை மறுக்கும் விதமாக பதிலளித்துள்ளார். சாம்சங் நிறுவனத்தின் பிராண்ட் அம்பாசடராக நியமிக்கப்பட்டுள்ளார் அமீர்கான். இதுதொடர்பாக மும்பையில் நடந்த விழாவில் அவர் பேசுகையில், கிரிக்கெட்டை எனக்குப் பிடிக்கும். ஆனால் அதை ரசிக்க மட்டுமே விரும்புகிறேன். எனது பணத்தைப் போட்டு ஒரு அணியை வாங்கும் யோசனை என்னிடம் இல்லை என்றார் அமீர்.

ஷாருக்கான் நோக்கியா நிறுவனத்தின் பிராண்ட் அம்பாசடராக உள்ளாரே என்று கேட்டபோது, சாம்சங் செல்போன்கள்தான் பெஸ்ட். வழக்கம் போல ஷாருக்கான் செகண்ட் பெஸ்ட் என்றார் புன்னகையுடன்.