தங்கம் விலை மேலும் ரூ.160 சரிவு

சென்னை: தங்கம் விலை இன்று மேலும் ரூ.160 குறைந்தது.

தங்கம் விலை கடந்த சில மாதங்களாகவே தொடர்ந்து அதிகரித்து வந்தது. கடந்த 2003-ம் ஆண்டு சவரன் ரூ. 4,200க்கு விற்கப்பட்ட தங்கத்தின் விலை படிப்படியாக உயர்ந்து இந்த ஆண்டு தொடக்கத்தில் ரூ.7,600-ஐ தொட்டது.

இந்நிலையில் கடந்த 16-ந் தேதி வரலாறு காணாத வகையில் சவரன் விலை ரூ.10,040-ஐ தொட்டது. அனைத்து தரப்பினரையும் அதிர்ச்சிக்குள்ளாக்கியது. தங்கம் விலை மேலும் உயரும் என்ற கவலையை ஏற்படுத்திய நிலையில் நேற்று சவரனுக்கு ரூ.232 குறைந்தது.

இன்று சவரன் விலையில் மேலும் ரூ.160 சரிந்தது. இன்று சவரன் விலை ரூ.9,648. ஒரு கிராம் ரூ.1,206க்கு விற்கப்படுகிறது.

வெள்ளி விலையும் கிராமுக்கு 40 காசுகள் குறைந்துள்ளது. இன்று ஒரு கிராம் வெள்ளி ரூ.28.45க்கு விற்கப்படுகிறது.