பெண் துறவிகளை கற்பழிக்க முயன்ற சாமியார்!!

அகமதாபாத்: குஜராத் மாநிலத்தில் இரு இளம் பெண் துறவிகளை கற்பழிக்க முயன்ற சாமியாரை போலீஸார் கைது செய்தனர்.

செளராஷ்டிர மாவட்டம் ஜுனாகத் என்ற இடத்தில் இந்த சம்பவம் நடந்துள்ளது.

இரண்டு இளம் பெண் துறவிகள் ஜூனாகத் சென்றனர். அங்கு மஹாகல்கிரி என்ற சாமியாரை சந்தித்தனர். அப்போது அந்த சாமியார், சோம்நாத்தில் ஒரு அன்னதான நிகழ்ச்சி நடைபெறுகிறது. அதில் கலந்து கொண்டால் புண்ணியம் என்று கூறியுள்ளார்.

இதைக் கேட்டதும் தாங்களும் சோம்நாத் வருவதாக இரு பெண் துறவிகளும் கூறியுள்ளனர். இதையடுத்து இரு துறவிகளையும் அழைத்துக் கொண்டு கிளம்பினார் சாமியார்.

வழியில் ஆள் நடமாட்டமற்ற ஒரு இடத்தில் மூன்று பேரும் தங்கினர். அப்போது சாமியார், அந்த இரு பெண் துறவிகளையும் கற்பழிக்க முயன்றார்.

சாமியாரின் சதிச் செயலை உணர்ந்த இரு பெண் துறவிகளும் கடுமையாகப் போராடி அவரிடமிருந்து தப்பி வந்தனர். பின்னர் தலாலா காவல் நிலையத்தில் சாமியார் மீது புகார் கொடுத்தனர்.

இதையடுத்து போலீஸார் சாமியாருக்கு வலை வீசினர். இந்த நிலையில் காமவெறி பிடித்த சாமியார் மத்திய குஜராத்தில் உள்ள கிம்கோடி என்ற கிராமத்தில் பதுங்கியிருப்பதாக தெரிய வந்தது.

இதையடுத்து அக்கிராமத்திற்கு அருகில் உள்ள பத்ரன் காவல் நிலையத்தை தலாலா போலீஸார் உஷார்படுத்தினர். இதைத் தொடர்ந்து பத்ரன் போலீஸார் விரைந்து சென்று சாமியாரை வளைத்துப் பிடித்தனர்.

சாமியார் மீது தற்போது கற்பழிப்பு முயற்சி வழக்குப் பதிவு செய்யப்பட்டு விசாரணை நடந்து வருகிறது.