மே முதல் சென்னை - ராமேஸ்வரம் ரயில்!

புதுக்கோட்டை: சென்னை - ராமேஸ்வரம் இடையே அமைக்கப்பட்டுள்ள புதிய அகலப் பாதையில் மே முதல் ரயில்கள் ஓடத் தொடங்கும் என ரயில்வே இணை அமைச்சர் ஆர்.வேலு தெரிவித்துள்ளார்.

புதுக்கோட்டை வந்த வேலு, அங்கு பல்வேறு வளர்ச்சிப் பணிகள் குறித்து ஆய்வு நடத்தினார். பின்னர் செய்தியாளர்களிடம் வேலு பேசுகையில், சென்னை - ராமேஸ்வரம் பாதையில் அமைக்கப்பட்டுள்ள அகலப் பாதையில் மே மாதம் முதல் ரயில்கள் ஓடத் தொடங்கும்.

இப்பாதையில் வரும் காரைக்குடி மற்றும் மானாமதுரை மார்க்கத்தில் அகலப் பாதைப் பணிகள் வேகமாக நடந்து வருகின்றன.

மதுரை கோட்டத்தில் மட்டும் தற்போது ரூ. 40 கோடி மதிப்பிலான வளர்ச்சிப் பணிகள் நடந்து கொண்டுள்ளன.

புதுக்கோட்டை ரயில் நிலைய பிளாட்பாரம், 24 பெட்டிகள் கொண்ட ரயில்கள் நிற்பதற்கு வசதியாக விரிவுபடுத்தப்படும் என்றார் வேலு.