பாக்: வெளியுறவு அமைச்சராக குரேஷி நியமனம்

இஸ்லாமாபாத்: பாகிஸ்தான் வெளியுறவு அமைச்சராக ஷா மகமூது குரேஷி பொறுப்பேற்றுக் கொண்டார். பாதுகாப்பு அமைச்சராக செளத்ரி அகமது முக்தார் நியமிக்கப்பட்டுள்ளார்.

பாகிஸ்தானில் பிரதமராக பதவியேற்றுள்ள யூசுப் ரஸா கிலானி நேற்று தனது அமைச்சரவையை அறிவித்தார். மொத்தம் 24 பேர் அதில் இடம் பெற்றுள்ளனர். அனைவரும் நேற்றே பதவியேற்றுக் கொண்டனர். அதிபர் மாளிகையில் நடந்த பதவியேற்பு விழாவில் அதிபர் பர்வேஸ் முஷாரப் பதவிப்பிரமாணம் செய்து வைத்தார்.

புதிய வெளியுறவு அமைச்சராக மக்தூம் ஷா மகமூது குரேஷி பொறுப்பேற்றுள்ளார். பாதுகாப்பு அமைச்சராக செளத்ரி அகமது முக்தார் நியமிக்கப்பட்டுள்ளார்.

அமைச்சர்களாகப் பதவியேற்றுள்ளவர்களில் பலர், முஷாரப் ராணுவப் புரட்சியின் மூலம் ஆட்சியைப் பிடித்தபோது கைது செய்யப்பட்டு சிறையில் தள்ளப்பட்டவர்கள் ஆவர்.

பதவியேற்பு விழாவின்போது முஷாரப் முகத்தில் பெருத்த அமைதியும், இறுக்கமும் காணப்பட்டது.

பதவியேற்பு விழாவுக்கு வந்திருந்த நவாஸ் ஷெரீப் கட்சி நிர்வாகிகள் தங்களது கைகளில் கருப்புப் பட்டைகளுடன் வந்து முஷாரப்புக்கு எதிர்ப்பைக் காட்டினர்.