சேலத்துக்கு மேட்டூர் நீர் வாய்ப்பில்லை- கருணாநிதி

சென்னை: மேட்டூரில் இருந்து சேலத்துக்கு தண்ணீர் கொண்டு செல்வதற்கான சாத்தியக்கூறுகள் இல்லை என்று பாமக எழுப்பிய கோரிக்கைக்கு சட்டசபையில் முதல்வர் கருணாநிதி விளக்கமளித்தார்.

தமிழக சட்டசபையில் பட்ஜெட் மீது நடந்த விவாதம்:

ஜி.கே.மணி (பா.ம.க.): சில்லறை வணிகத்தில் பெரிய நிறுவனங்கள் ஈடுபடுவதைத் தடுக்க இந்த பட்ஜெட்டில் நடவடிக்கை எடுக்காதது வருத்தம் அளிக்கிறது. மேட்டூர் அணையில் இருந்து சேலத்துக்கு தண்ணீர் கொண்டு செல்ல நடவடிக்கை எடுக்க வேண்டும்.

முதல்வர் கருணாநிதி: மேட்டூர் தண்ணீரை சேலம் கொண்டு செல்ல வேண்டும் என்பது, கேட்க இனிப்பாக இருக்கிறது. ஆனால் ஆய்வு செய்தவர்கள் அவ்வளவு உயரத்துக்கு தண்ணீரை ஏற்ற முடியாது என்று அறிக்கை கொடுத்து இருக்கிறார்கள்.

அமைச்சர் துரைமுருகன்:- மேட்டூர் அணை நீர்மட்டம் 120 அடி. சேலத்துக்கு தண்ணீர் கொண்டு செல்ல வேண்டும் என்றால் 360அடி உயரத்துக்கு தண்ணீரை கொண்டு செல்ல வேண்டும். எனவே இந்த திட்டத்துக்கு சாத்தியக்கூறு இல்லை.