'கிரீமி லேயர்' என்றால் என்ன?

டெல்லி: பிற்படுத்தப்பட்டோருக்கான இட ஒதுக்கீட்டில், கிரீமி லேயர் எனப்படும் வசதி படைத்தோர் என்ற பிரிவு தற்போது பெரும் சலசலப்பை ஏற்படுத்தியுள்ளது.

பிற்படுத்தப்பட்டோருக்கான இட ஒதுக்கீட்டில், கிரீமி லேயர் பிரிவினரை சேர்க்கக் கூடாது என்று உச்சநீதிமன்றம் கூறியுள்ளது. இதற்கு அரசியல் கட்சிகள் எதிர்ப்பு தெரிவித்துள்ளன.

அது என்ன கிரீமி லேயர்?:

பொறியாளர்கள், டாக்டர்கள், நிதி நிர்வாக ஆலோசகர்கள், நடிகர், நடிகைகள், கதாசிரியர்கள், வசனகர்த்தாக்கள், விளையாட்டு வீரர்கள், வக்கீல்கள், சி.ஏக்கள், கணக்காளர்கள், கட்டடக் கலை நிபுணர்கள், கம்ப்யூட்டர் என்ஜீனியர்கள், ராணுவத்தில் உயர் பதவி வகிப்பவர்கள்.

ஆண்டு வருமானம் ரூ.2.50 லட்சத்திற்கு மேல் சம்பாதிப்பவர்கள் இந்த கிரீமி லேயர் பிரிவின் கீழ் வருகின்றனர்.

இவர்கள் தவிர குடியரசுத் தலைவர், பிரதமர், அமைச்சர்கள், எம்.பிக்கள், எம்.எல்.ஏக்கள், யுபிஎஸ்சி, டிஎன்பிஎஸ்சி உறுப்பினர்கள், மத்திய மற்றும் மாநில அரசுப் பணிகளில் உள்ள குரூப் 1, 2 ஆகிய அந்தஸ்துடைய அதிகாரிகள், பொதுத்துறை நிறுவன அதிகாரிகள் ஆகியோரின் வாரிசுகளுக்கும் இட ஒதுக்கீட்டின் பலன் கிடைக்காது என்பது குறிப்பிடத்தக்கது.

இந்த கிரீமி லேயர் பிரிவால், பிற்படுத்தப்பட்ட வகுப்பினருக்கு இட ஒதுக்கீட்டின் பலன் முழுமையாக கிடைக்காது என்பது அரசியல் கட்சிகளின் வாதமாகும்.