மதுரை காமராஜ் பல்கலை புதிய துணைவேந்தர் ஆர். கற்பகபெருமாள்

சென்னை: மதுரை காமராசர் பல்கலைக்கழக புதிய துணைவேந்தராக ஆர்.கற்பகபெருமாள் நியமிக்கப்பட்டுள்ளார்.

தமிழக கவர்னர் சுர்ஜித்சிங் பர்னாலா இதற்கான உத்தரவை பிறப்பித்தார். கற்பக பெருமாள் இந்த பதவியில் 3 ஆண்டுகள் இருப்பார். இதற்கு முன் திருச்சி பாரதிதாசன் பல்கலைக்கழக கல்வி தொழில்நுட்பவியல் துறை தலைவராக இருந்தார்.

தேசிய கல்வித் திட்டம், பள்ளிக் கல்வியில் தகவல் தொடர்பு மற்றும் தொழில்நுட்பம் குறித்த தேசிய கொள்கை ஆகியவற்றை உருவாக்கியதில் முக்கிய பங்காற்றியவர்.

சர்வதேச ஆராய்ச்சித் திட்டத்தின் ஒரு பகுதியாக ஆக்ஸ்போர்டு, கேம்பிரிட்ஜ் பல்கலைக்கழகங்களுக்கும், பாரீஸ் சர்வதேச கல்வி திட்ட நிறுவனம் உள்ளிட்ட 20க்கும் மேற்பட்ட உயர் கல்வி நிறுவனங்களில் ஆய்வுப் பயணம் மேற்கொண்டுள்ளார்.