'நைட்டி'யில் இரவுப் பணி - 4 பெண் போலீஸார் உள்பட 9 பேர் சஸ்பெண்ட்!

சென்னை: இரவு நேரப் பணியில் இருந்த 4 பெண் போலீஸார் நைட்டியுடன் இருந்ததைப் பார்த்து போலீஸ் கமிஷனர் நாஞ்சில் குமரன் அதிர்ச்சி அடைந்தார். அவர்களும், மது போதையில் இருந்த 5 ஆண் போலீஸாரும் சஸ்பெண்ட் செய்யப்பட்டனர். ஒருவர் கைது செய்யப்பட்டார்.

சென்னை போலீஸ் கமிஷனர் நாஞ்சில் குமரன் தலைமையில் 3 இணை கமிஷனர்கள், 12 துணை கமிஷனர்கள், இன்ஸ்பெக்டர்கள், எஸ்ஐகள் மற்றும் 7000 போலீசார், 500 ஆயுதப்படை போலீசார் நேற்று முன்தினம் இரவு சென்னையில் அதிரடி ரெய்டு நடத்தினர்.

இதற்காக மாநகரில் 500 சோதனை சாவடிகள் அமைக்கப்பட்டிருந்தது. இரவு 10 மணிக்கு தொடங்கிய ரெய்டு அதிகாலை
4 மணி வரை நடந்தது.

இந்த சோதனையில் 150 பழைய குற்றவாளிகள், 50 ரவுடிகள், பிடிவாரன்ட் பிறப்பிக்கப்பட்ட 50 பேர், குடிபோதையில் வாகனம் ஓட்டிய 100 பேர் கைது செய்யப்பட்டனர். முன்னெச்சரிக்கை மற்றும் ஹெல்மெட் அணியாத 600 பேரும் பிடிபட்டனர்.

இதில் சிறு வழக்குகளில் பிடிபட்ட 100 பேர் ஆர்டிஓ முன் ஆஜர்படுத்தப்பட்டு நிபந்தனை ஜாமினில் விடுவிக்கப்பட்டனர். இந்த சோதனையில் 1250 பேர் சிக்கினர். அவர்களது கைரேகைகள் பதிவு செய்யப்பட்டன.

நைட்டியில் இருந்த பெண் போலீஸார்

ரெய்டின்போது கமிஷனர் நாஞ்சில் குமரன் சென்னை முழுவதும் ரோந்து சென்றார். இரவு 10 மணிக்கு துறைமுகம் எதிரில் உள்ள கலெக்டர் அலுவலகம் சென்றார்.

அங்கு பாதுகாப்பு மகா மோசமாக இருந்ததைப் பார்த்து ஆணையர் அதிர்ச்சி அடைந்தார்.

அங்கு பிரவீனா, சவீதா, ஷீலா, சத்யா ஆகிய பெண் போலீஸாரும், பழனி, பன்னீர் செல்வம், பாரதி, மருதப்பன், யோவான் ஆகியோர் பணியில் ஈடுபட்டிருந்தனர். இவர்களில் பழனி தலைமைக் காவலர் ஆவார்.

ஆணையர் ரோந்து வந்தபோது, நான்கு பெண் போலீஸாரும் நைட்டியுடன் காணப்பட்டனர். பழனியைத் தவிர மற்ற நான்கு போலீஸாரும் தூங்கிக் கொண்டிருந்தனர். பழனியும் போதையில் தள்ளாடியபடி காணப்பட்டார். கையை சரியாகத் தூக்கி சல்யூட் கூட அடிக்க முடியாமல் சிரமப்பட்டார்.

காவலர்கள் இருந்த கோலத்ைதப் பார்த்து கோபமடைந்த ஆணையர் 9 பேரையும் சஸ்பெண்ட் செய்ய உத்தரவிட்டார். மேலும் பழனியைக் கைது செய்யவும் உத்தரவிட்டார். அதன்படி பழனி கைது செய்யப்பட்டார். பின்னர் அவர் ஜாமீனில் விடுவிக்கப்பட்டார்.

நைட்டியில், இரவுப் பணியில் இருந்த பெண் போலீஸாரால் சென்னை காவல்துறையில் பெரும் பரபரப்பு ஏற்பட்டுள்ளது.