கர்நாடகா: காங்கிரஸ் வேட்பாளர் முதல் பட்டியல் வெளியீடு
டெல்லி: கர்நாடக சட்டசபைத் தேர்தலில் முதல் கட்ட வாக்குப் பதிவு நடைபெறும் 89 தொகுதிகளில் 84க்கான வேட்பாளர்களை காங்கிரஸ் கட்சி அறிவித்துள்ளது.
கர்நாடகா சட்டமன்ற தேர்தல் 3 கட்டங்களாக நடக்க உள்ளது. வேட்பாளர்களின் பட்டியலை மாநில காங்கிரஸ் தயாரித்து தலைமைக்கு அனுப்பியது. நேற்று முன் தினம் இரவு காங்கிரஸ் மேலிட தலைவர்கள் தலைமையில் பட்டியல் பரிசீலிக்கப்பட்டது. இந்த கூட்டத்தில் அதிருப்தி அடைந்த அக்கட்சியின் பிரசாரக்குழு தலைவர் சித்தராமையா வெளிநடப்பு செய்தார். பின்னர் அக்கட்சியின் தலைவர் சோனியாவை நேற்று சந்தித்து பேசிய சித்தராமையா பின்னர் சமாதானம் அடைந்தார்.
இந்நிலையில் மே 10ம் தேதி முதல் கட்டமாக நடக்க உள்ள 89 தொகுதிகளில் 84 தொகுதியில் காங்கிரஸ் சார்பில் போட்டியிடும் வேட்பாளர்களின் பட்டியல் நேற்று வெளியிடப்பட்டது. இதில் 9 தொகுதிகள் பெண்களுக்கு ஒதுக்கப்பட்டுள்ளது.
மீதமுள்ள 5 தொகுதிகளில் போட்டியிடும் வேட்பாளர்களின் பட்டியல் இன்று அறிவிக்கப்படலாம் என்று தெரிகிறது. வேட்பாளர் தேர்வில் இழுபறி நீடிப்பதாக கூறப்படுகிறது.
பாஜகவைப் போலவே, காங்கிரஸ் சார்பிலும் தமிழர்களுக்கு வாய்ப்பளிக்கப்படவில்லை. தமிழர்களின் வாக்குகள் அதிகம் உள்ள காந்தி நகரில் திணேஷ் குண்டுராவ் நிறுத்தப்பட்டுள்ளார். சிவாஜி நகரில் ரோஷன் பெய்க் நிறுத்தப்பட்டுள்ளார். சாந்தி நகரில் ஹாரிஸ் நிறுத்தப்பட்டுள்ளார். கோலார் தங்க வயரில் சீனிவாஸ் நிறுத்தப்பட்டுள்ளார்.