'விறு விறு' கத்திரி - சென்னையில் அனல் காற்றுடன் கடும் வெயில்!

சென்னை: அக்னி நட்சத்திரம் தொடங்கிய 2வது நாளிலேயே சென்னையில் இன்று கடும் வெப்பம் நிலவியது. அனல் காற்றும் கூடவே வீசியதால் மக்கள் பெரும் அவதியைடந்தனர்.

கத்திரி எனப்படும் அக்னி நட்சத்திர வெயில் நேற்று முதல் தொடங்கியுள்ளது. இதனால் தமிழகம் முழுவதும் நேற்று நல்ல வெயில் அடித்தது. அதிகபட்ச வெயில் சென்னையில் 107 டிகிரியாக பதிவானது.

வேலூரிலும் இதே அளவில்தான் வெயில் இருந்தது. கடலூரில் 106 டிகிரியும், திருச்சியில் 105 டிகிரியும், வெயில் பதிவாகியது.

மதுரை, நெல்லை ஆகிய நகரங்களிலும் 100 டிகிரியைத் தாண்டி வெயில் இருந்தது.

மாநிலத்தின் பெரும்பாலான பகுதிகளில் நேற்று 100 டிகிரியைத் தாண்டித்தான் வெயிலின் அளவு இருந்தது.

இந்த நிலையில் இன்று சென்னையில் கடும் வெயில் நிலவியது. மாநிலத்தின் பெரும்பாலான பகுதிகளிலும் இதே நிலைதான். நேற்று போலவே இன்றும் வெயில் கடுமைாயக இருந்த சென்னையில் இன்று 108 டிகிரி வெயில் பதிவானது.

சென்னை நகரில் இன்று மக்கள் நடமாட்டம் பகல் நேரத்தில் மிக மிக குறைவாக காணப்பட்டது.

கடும் வெயிலுடன் அனல் காற்றும் வீசியதால் சாலைகளில் மக்கள் நடமடாவே பயந்தார்கள். இரு சக்கர வாகனங்கள், சைக்கிள்கள் போன்றவற்றை மிக மிக குறைந்த அளவே காண முடிந்தது.

சென்னை புறநகர்ப் பகுதிகளில் 109 டிகிரி அளவுக்கு வெயில் கடுமையாக இருந்தது.