கர்நாடகம்: யாருக்கு ஓட்டு- தமிழர்களுக்கு ரஜினி 'அட்வைஸ்'

பெங்களூர்: கர்நாடக தமிழர்களுக்கு ஆதரவான தலைவர்களை அடையாளம் கண்டு அவர்களுக்கு வாக்களிக்குமாறு அம் மாநில தமிழர்களுக்கு நடிகர் ரஜினிகாந்த் கோரிக்கை விடுத்துள்ளார்.

ஓகேனக்கல் கூட்டுக் குடிநீர் பிரச்னை தொடர்பாக சென்னையில் திரைப்படத் துறையினர் நடத்திய உண்ணாவிரத போராட்டத்தில் கலந்து கொண்டு கர்நாடகா தமிழர்களுக்கு ஆதரவாக ரஜினிகாந்த் பேசினார்.

இதற்கு நன்றி தெரிவித்து கர்நாடக தமிழர் சங்கம் ரஜினிகாந்த்துக்கு கடிதம் எழுதி இருந்தது. இதையடுத்து கர்நாடக தமிழர் சங்கத் தலைவர் ராசு மாறனுக்கு ரஜினி பதில் கடிதம் அனுப்பியுள்ளார்.

அந்த கடிதத்தில் ரஜினி கூறியதாவது:

தங்களுடைய கடிதம் எனக்கு தாமதமாக கிடைத்தது. நீங்கள் அனைவரும் என் மீது வைத்திருக்கும் அன்புக்கும், பாசத்துக்கும், அக்கரைக்கும் நான் தலைவணங்கி என் மனமார்ந்த நன்றியினை தெரிவித்துக் கொள்கிறேன்.

கர்நாடகாவில் வாழும் தமிழ் மக்களுக்கு ஆதரவாக, அவர்களுடைய நன்மைக்கும், பாதுகாப்புக்கும் குரல் கொடுக்கிற தலைவர்களை அடையாளம் கண்டு அவர்கள் தேர்தலில் ஜெயிக்கவும், புகழோடு வாழவும் பாடுபடுங்கள்.

அப்போதுதான் உங்களுக்கு ஒரு பிரச்சினை என்றால் அவர்கள் உங்களுக்கு பாதுகாப்பாக இருப்பார்கள்.

மற்றும் உங்கள் குடும்பம், தாய், தகப்பனார், நல்ல நண்பர்களை கவனிப்பது உங்கள் முதல் கடமையாக இருக்கட்டும். வாழ்க தமிழ் மக்கள்.

இவ்வாறு கூறியுள்ளார் ரஜினி.