பஜாஜ்-ரெனால்ட்-நிஸ்ஸான் இணைந்து தயாரிக்கும் ரூ. 1 லட்சம் கார்

டெல்லி: டாடாவின் நானேவுக்கு போட்டியாக பஜாஜ் நிறுவனமும் ரூ. 1 லட்சத்துக்கு கார்களை தயாரிக்கவுள்ளது. இந்த கார் 2011ம் ஆண்டு விற்பனைக்கு வரும்.

பிரான்சின் ரெனால்ட், ஜப்பானின் நிஸ்ஸான் ஆகிய நிறுவனங்களுடன் இணைந்து இந்த கார் தயாரிப்பில் இறங்குகிறது பஜாஜ்.

நாட்டின் முன்னணி இரு சக்கர கார் தயாரிப்பு நிறுவனமான பஜாஜ், ஆட்டோக்களையும் தயாரித்து வருகிறது.

இந் நிலையில் கார் தயாரிப்பில் காலடி எடுத்து வைக்கவுள்ளது. இதற்காக ரெனால்ட்-நிஸ்ஸான் ஆகியவற்றுடன் இணைந்து புதிய நிறுவனத்தை பஜாஜ் துவங்கவுள்ளது.

இந்த நிறுவனத்தில் பஜாஜ் 50 சதவீதமும் ரெனால்ட், நிஸான் ஆகியவை தலா 25 சதவீதமும் முதலீடு செய்யவுள்ளன.

இந்த கார்கள் ரூ. 1 லட்சம் விலையுடன் கூடிய சிறிய ரக கார்களாக இருக்கும் என பஜாஜ் நிறுவனம் தெரிவித்துள்ளது. இந்த காருக்கு யு.எல்.சி. என இப்போதைக்கு 'கோட் நேம்' சூட்டப்பட்டுள்ளது. பின்னர் உரிய பெயர் தேர்வு செய்யப்படும்.

இந்த கார் தயாரிப்புக்காக மகாராஷ்டிர மாநிலம் சக்கானில் புதிய தொழிற்சாலையை பஜாஜ் கட்ட ஆரம்பித்துள்ளது.
வருடத்துக்கு 4 லட்சம் கார்களை தயாரிக்கும் வகையில் மிக பிரமாண்டமான தொழிற்சாலையாக இது உருவாக்கப்பட்டு வருகிறது.

இன்னும் 3 ஆண்டுகளில் கார் தயாரிப்பு தொடங்கும். 2011ம் ஆண்டில் கார் விற்பனை தொடங்கும். இந்தியா தவிர பிற நாடுகளுக்கும் இந்த கார்களை ஏற்றுமதி செய்ய திட்டமிடப்பட்டுள்ளது.